Кашан коьмек этилмеге болады

Гражданларга психиатрический коьмек этуьв «Психиатрический коьмек эм гражданларга оны эткенде олардынъ ыхтыярларын канагатлав» деген РФ Законы ман йорыкластырылады. Законнынъ 33 статьясына коьре психиатрический тергев сол аьдемде психиатрический авырув бар ма, ога коьмек керек пе эм кайдай коьмек керек экенин билуьв уьшин озгарылады. Психиатрический тергев гражданиннинъ оьзиннен яде онынъ ваькилиннен  ыхтыярсыз озгарылмага болады, эгер онынъ авырувыннан тура тоьгеректегилерге эм оьзине кавыфлык тувса, эгер ол оьз буйымларын оьзи битирип болмаса эм ол психиатрический ярдамсыз калаяк болса. Авырыйтаган гражданинге онынъ оьзиннен яде онынъ ваькилиннен ыхтыярсыз тергев озгарув акында карар врач-психиатрдынъ  йогарыда белгиленген себеплерге негизленген язувынынъ аркасында алынады. Тергев акында аьризе тергелмеге керек аьдемнинъ ювыклары ман, врач пан, должностной аьдемлер мен яде гражданлар ман язылмага болады. Айлак амалсыз, алгасавлы заманларда, эгер кавыфлык бар болса, аьризе авыз бан айтылмага да болады. Сондай заманларда психиатрический тергев акында карарды врач-психиатр тез арада язады. Эгер кавыфлык йок болса, психиатрический тергев акында карар алгасамай, баьри де йорыкларды тутып, психиатрический тергев не зат уьшин кереккенин анълатып, язылады. Психиатрический тергев керек экени ыспатланган сонъ, врач-психиатр оьзининъ карарын ерли судка язып йибереди. Судья уьш куьннинъ ишинде тергев озгарув акында санкция беруьв соравын шешеди. Психиатрический тергев негизинде гражданинди психиатрический диспансерге куьштен ерлестируьв акында сорав шешиледи.

А.Дильманбетов, район прокурорынынъ куллыгын юритуьвши, юстициядынъ киши советниги.