Грипп авырувдынъ уьйреншикли белгилери бирден эт кызув (39-40 градус), тонъдырув, бас авырув, суьеклер эм сом этлер авырув болады. Баска сувык тийип авырувларда болатаган тымав эм тамак авырув гриппте биринши куьнлерде коьринмейди. Биревлер гриппти эмлев пайдасыз, ол авырув кавыфлы тувыл, оьзи таяды деп ойлайдылар.

      Грипп бек кавыфлы авырув. Оннан кишкей балалар эм эсли аьдемлер арасында оьлим де йолыгады. Оннан баска болып грипп оьзиннен сонъ туьрли калдыклар калдырмага болады. Гриппти басланганлай ок, заманында эмлемеге тийисли. Боьтен де, грипптинъ оьсип, куьш алувын токтатув маьнели. Грипптинъ оьткир заманы, авырув аьдемге юккан аьсери. Аьне сол заман эмлев пайдалы, аьне сол заман аьдем эмленсе, грипптен авыр калдыклар болмайды. Куьшли эт кызувды сонда ок тайдырув керек тувыл. Эт кызув аьдемнинъ шаркы оьзи грипп пен куьресетаганы акында шайытлайды. Биревлерде эт кызув айлак авыр озады: карув таяды, суьеклер эм сом этлер авырыйдылар. Сондай аьллерде докторлар эт кызувды туьсирмеге маслагат этедилер, ама сонда да 38 градустан тоьмен туьсируьв керек тувыл. Гриппти антибиотиклер мен эмлев пайдасыз, антибиотиклер тек микробларга зыян келтиреди, вирусларга баска дарманлар керек. Грипп пен авырымас уьшин витаминлер, соган, сарымсак, капуста эм лимон ашаса, таман деп санайдылар биревлер. Витаминлер аркасында авырувдынъ алдын шалув – шаркты ортак беркитуьв болады.       

      Грипптинъ алдын шалувдынъ энъ пайдалысы – шаркты шыныктырув, иммунитетти куьшлендиретаган препаратлар, вакцинация эм, оьзек те, витаминлер. Биревлер ойлайдылар – прививка эткеннен сонъ аьдем авырымайды деп. Вакцинациядан сонъ да аьдем авырымага болады, ама онынъ кавыфы аз. Прививка аьдемди грипп пен авырувдан 80-90 процентке аман саклайды. Гриппке карсы вакцинация этуьвдинъ энъ ийги заманы сентябрьден ноябрьге дейим. Эпидемияга дейим 2-3 юма алды прививка эттирсе ийги. Эгер эпидемия басланган болса, прививкады сонда да этпеге ярайды, тек оны тири тувыл вируслар ман озгармага тийисли. Ама прививка аьдем авырыганнан сонъ этилсе, онынъ пайдасы болмайды.