Эртеректе соьйлесилгенлей, сол акша карыжы баьриси де район орталыгы Терекли-Мектеб авыл паркын, А.Асанов атындагы орамын эм Афганистанда интернационалист аьскер борышын толтырган авылдаслар ман чернобыльшилер паркын коьрклендируьв ислерине деп белгиленген эди. 
      Оьтип бараяткан эски 2018-нши йылымыздынъ ызында бу программадынъ калай аьлде толувы ман байланыста «село Терекли-Мектеб» СП МО администрация аькимбасы Зейдулла Аджибайрамов пан йолыгыспага туьсти. Онынъ айтувы ман, район орталыгынынъ Карл Маркс атындагы орамынынъ бир тротуарына янъы плиталар тоьселген. Бу тротуардынъ бойы ман (узынлыгы 600 метр) янъы парк олтыргышлары ман янъы урналар салынадылар. «Соны ман бирге тротуар бойы ман янъы фонарьлер де салынып басланган. А.Асанов орамында 600 метр узынлыгы ман янъы тротуар тоьселди. Парк ишинде узынлыгы 20 метр эм кенълиги де 20 метр болган янъы балалар майданы да курылган. Аьли сол майдан уьшин керекли алатлар баьриси де аькелинген эм туьзилип басланган. Соны ман бирге ерли афганшылар ман чернобыльшилер паркында да узынлыгы 8 метр эм кенълиги 13 метр болган янъы балалар майданы курылды», – дейди З.Аджибайрамов. 
Онынъ соьзи мен, келеекте район орталыгындагы МЖС микрорайонында, Мир орамында, ветуправление артында да балалар майданларын курмага деген ийги ниетлер бар. Авылдынъ Победа микрорайонында мундагы депутат Асанбий Дельяновтынъ аьрекети эм халктынъ коьмеги мен янъы балалар майданы курылды. Авыл аькимбасынынъ айтувы ман, бу майдан курылысына солай ок авыл администрациясы да оьз ярдамын эткен. 
      «Район паркындагы эски балалар майданындагы алатларды авылдынъ куьнтуварындагы «Совхоз» микрорайонына коьширдик, мунда балалар майданына ер аьзир этилинди. Келеяткан йыл администрациядынъ оьз карыжларыннан Наурды Эсмухамбетов орамында балалар майданын курмага ойлаймыз. Район орталыгымыздагы орам йолларымыз осал. Йол фондына янъы 2019-ншы йылга 2 миллион 500 мынъ маьнет шыгарылмага каралган, озып бараяткан эски йылымызда да йол фонды уьшин сол шаклы карыж шыгарылган эди. Келеяткан янъы йылда авылдынъ орта Эдиге орамында автомашиналарга токталув уьшин майдан салмага деген ойымыз бар. Капымызга келип турган янъы 2019-ншы йылымыз бан баьри авылдасларымызды да кутлайман эм баьри ийги мырадларымыз да толсын деп йорайман», – деди авыл аькимбасы.

М.Юнусов.