«Ийги затты ийги деп айтув керек» район орталыгын коьрклендируьв ислерине белги берилди

Публичный шараларда «Ногайский район» МР администрациясынынъ аькимбасынынъ 2018-нши йылдынъ 12-нши январиндеги 7-нши номерли токтасы ман туьзилген ямагат комиссиясы, солай ок Терекли-Мектеб авылынынъ яшавшылары ортакшылык эттилер.  «Ногайский район» МР администрациясынынъ Ямагат палатасынынъ председатели Эльмурза Саитов ортак шарадынъ ниети акында айтып билдирди эм «Единая Россия» Савлайроссиялык политикалык партиясы, ДР Оькимети эм ДР Курылыс, коьлик эм ЖКХ министерствосы Ногай районына сондай эс бергени уьшин разылык билдирди. «Ногайский район» МР Согыс эм ис ветеранлар советининъ председатели Акманбет Сангишиев Терекли-Мектеб авылынынъ ямагат ерлерин коьрклендируьв бойынша оьткерилген ислерди макул коьрди, сол куллыклардынъ аьруьв якларын айырып белгиледи. Терекли-Мектеб авылдынъ яшавшылары атыннан шарада Кадрев Аджиев пен Сталинбек Муллаев шыгып соьйледилер. Олар район орталыгынынъ Ф.Капельгородский атындагы паркынынъ эм А.Асанов атындагы орамынынъ коьрклери ийги ягына туьрленгенин белгиледилер. Соны ман бирге ямагат комиссиясы эм район орталыгынынъ яшавшылары авылдынъ К.Кидирниязов эм В.Мокринский атындагы орамларынынъ ортасында курылган янъы балалар майданы бу микрорайонындагы балалар уьшин шатлыклы оьзгерис болганы акында айтып оздылар. «Ийги затты ийги деп айтув керек», – деген соьзлери мен ортак шарадынъ катнасувшылары Терекли-Мектеб авылдынъ ямагат ерлерин коьрклендируьв ислерине тийисли белгисин бердилер.

А.Муллаев, «Ногайский район» МР администрациясынынъ архитектура эм ЖКХ боьлигининъ начальниги.

Суьвретте: ямагат комиссиясы авыл паркында.