Сонынъ акында муннан алдын РФ Президентине ветеранлар организацияларыннан тилеклер туьскен эди. Владимир Путин соларды хош коьрип, быйыл 15-нши февральде сондай мереке мен байланыслы эстеликли шараларды уйгынламага тапшырган.

Дагестан Республикасында бу маьнели оьзгериске аьзирлик коьруьв мен байланыслы уйгынлав соравларын ойласувда республикадынъ Оькиметининъ Председателининъ маслагатшысы Владислав Шаталов, ДР маданият министри Зарема Бутаева, ДР ис эм социаллык оьрленуьв министри Изумруд Мугутдинова, бир неше министерстволар эм ведомстволар етекшилери катнастылар.

Кенъестинъ катнасувшылары белгилегенлей, Афганистан еринде болып оьткен согысларда ян берген аьскерши-дагестанлылардынъ эстелигине багысланып регионда яслар арасында дзюдо куьреси бойынша чемпионат оьткерилеек. Республикадынъ районларында эм калаларында аьскерши-интернационалистлердинъ сыйына спорт ярыслары, турнирлер эм спартакиадалар уйгынланып озгарылмага каралады. Махачкалада айтылган оьзгериске багысланып митинг эм шатлыклы шара оьткерилеек.
Сол куьнлерде тоьгерек столлар озгарылып, яс-явкады патриотизм негизинде тербиялав бойынша куллык юритуьвши ветеранлар эм яс-явка ямагат биригуьвлерининъ биргелес аьрекети ойласылаяк. 

Махачкалада солай ок тематикалык китап-иллюстрация выставкалары, фотосуьвретлер выставкалары ашылаяклар, Афганистанда болып оьткен согыс катнасувшылары ман яслардынъ йолыгыслары болып озаяк. 

Кенъестинъ катнасувшыларынынъ айтувлары ман, бу шараларга яс аьдемлерди де, боьтен де кадетлерди киргистуьвге айырым маьне бермеге керегеди.
Кенъестинъ тамамын келтире келип, Анатолий Карибов Афганистан Республикасыннан совет аьскершилерининъ куьбин шыгарувга 30 йыл толувына багысланган баьри шараларды да йогары уйгынлав дережесинде оьткермеге керегин тагы да бир кере белгилеген.