Ногай халктынъ оьлимсиз тавысы

Конференция куллыгында ТЮРКСОЙ бас секретари, посол Дюсен Касеинов, Таджикистаннынъ Турция элинде дайымлык эм толы ыхтыярлы посолы Махмадали Раджабиен, Анкарада университеттинъ политикалык илмилерининъ кафедрасынынъ етекшиси, Турция Республикасынынъ президентинде аьрекет эткен тыс политикасынынъ эм кавыфсызлыгы бойынша советининъ агзасы доктор Исмаил Сафи, ногай тюрклерининъ биргелес ярдамласув ассоциациясынынъ бас председатели Мухаррем Йылмаз, «Шоьл тавысы» республикалык газетасынынъ бас редакторы Эльмира Кожаева, яс ногай шаири Айзанат Камалдинова, Анкарада ногай диаспорасынынъ коьпсанлы ваькиллери, маданият эм саният суьювшилери эм сондай баскалар ортакшылык эттилер.  

Конференциядынъ барысында Касеинов  «Тюрк дуныясынынъ белгили аьдемлери» деген лекциялары ТЮРКСОЙ ман 2017-нши йылда басланганы акында эм олар  коьримли аьдемлердинъ  атларын дуныялык оьлшемде  яйылдырув мырат пан этилетаганы акында хабарлады. Бу конференциядынъ озгарылувы ман, биз яшавдан эрте кеткен, ана тилининъ оьрленуьвине уьйкен уьлисин коскан ногай шаири Кадрия Темирбулатовадынъ ярык эстелигин оьрметлеймиз. Ногай халкынынъ оьнерли кызынынъ аты ман  савлай дуныялык ямагатын таныстырмага аьзирмиз, – деди ол. 

25 йыллык мерекесин белгилейтаган, баска болып Тюрк дуныясынынъ 250 миллионлык бай маданиятын яйылдырув исинде  белгили болган «Тюрк дуныясынынъ ЮНЕСКО-сы» деп те  белгили болган ТЮРКСОЙ аьрекетининъ  маьнелигин де  белгилеп кетти. Ол Тюрк маданиятынынъ  халклар ара организациясына ногай халкынынъ  зейинли шаири Кадрия Темирбулатовадынъ эстелигине багыслап озгарган  шара уьшин разылыгын билдирди. 

– Кадрия Темирбулатова ногай маданиятынынъ энъ бийиклигинде турады, онынъ аты Эльмира Кожаевадынъ документальлик фильми мен оьмирлерге калган, деп белгиледи Мухаррем Йылмаз. 

Хошлав соьзлериннен сонъ профессор, доктор Дилек Эргененч эм Эльмира Кожаева шаирдынъ яратувшылык йолы акында оьз докладларын окыдылар. Айзанат Камалдинова Кадриядынъ ятлавларын окып эситтирди. Шарадынъ барысында  режиссер Э.Кожаева ман шаирдинъ яшав йолы, яратувшылыгы акында  «Кадрия» деген художестволык-документальлик фильми коьрсетилди. Ногай йырлавшылары Арсланбек Султанбеков эм Ислам Сатыров Кадриядынъ соьзлерине язылган йырларын йырлап эситтирдилер. 

Зехре Эргин ногай халкынынъ биювлерин оьнерли бийип коьрсетти. Конференциядынъ сонъында ТЮРКСОЙ етекшиси Дюсен Касеинов доктор Исмаил Сафиге, профессор, доктор Муса Йылдызга, белгили ногай артисти Арсланбек Султанбековка ТЮРКСОЙ-дынъ 25 йыллыгына багысланган эстеликли савгаларын, баска болып шара катнасувшыларга баргыларын савгалады. 

«Кадрия» деген художе-стволык-документальлик фильми уьшин Э.Кожаева Чингиз Айтматов атындагы Ордени мен савгаланды. Баска конференция Ногай шоьлдинъ оьлимсиз тавысы  Кадрия Темирбулатовага багысланып туьрк каласы Аданада да оьтти. Онда ерли ногай диаспорадынъ ваькиллери ортакшылык эттилер. 

ТЮРКСОЙ, Аданадынъ мэриясы, ногай тюрклерининъ ара ярдамласув эм маданият ассоциациясы ман  эм Адана крым тюрклерининъ ассоциациясы ман бирге уйгынланган  шарадынъ куллыгында  шакырылган коьп  конаклар ортакшылык эттилер. 

Оьзининъ соьзинде ТЮРКСОЙ етекшиси Касеинов ортак тюрк маданиятын яйылдырув эм саклав бойынша ТЮРКСОЙ аьрекети  йыл сайын оьсип баратаганына эм  Адана каласынынъ аькимбасы  Хюсеин Сезлю сосындай шараларды уйгынлап, озгарып келгени уьшин  уьйкен разылыгын билдирди. 

Сезлю коьп санлы ногай эм крым тюрклерининъ диаспоры туратаган Джехунада  оьскени акында да  йыйылганларга билдирди. Баска болып ногай шаири Кадрия Темирбулатовадынъ эстелигине багысланган конференцияда ортакшылык этпеге амал тувганына разылыгын билдирди. 

Конференциядынъ сонъында профессор, доктор Дилек Эргенч эм Эльмира Кожаева Кадрия Темирбулатовадынъ яшав йолы эм яратувшылыгы акында докладлары ман шыгып соьйледилер. Айзанат Камалдинова шаирдинъ ятлавлары ман йыйылганларды окып таныстырды. 

Шарада Тюрксой, Эльмира Кожаева, Арсланбек Султанбеков, Ислам Сатыров пан аьзирленген программа йогары коьнъилде  коьрсетилди. Конференцияда ортакшылык эткенлер оьнерли ногай кызынынъ яратувшылыгы ман толы таныстылар. 

Суьвретте: Анкарада конференцияда катнасувшылар.