Бу ийги ис Нариман авылынынъ яшавшысы, «Инсан» фондынынъ ваькили Адиль Эсенгельдиевтинъ ойы ман яшавга шыгарылды. Сол куьн ямагатлык исте авыл яшавшылары, авыл администрациясынынъ, собес, мектеб окытувшылары эм окувшылары, «Шолпан» балалар бавынынъ куллыкшылары эм сондай баскалар белсенли аьрекет эттилер.

Авыл администрациясы авыл тазалыгын яклап шыкканларды техника ман, керекли алатлар ман канагатлады. Сол куьн субботникке деп йыйылганлар куьплесип, авыл паркынынъ ишин, эстеликлер тоьгерегин тазаладылар, администрация артындагы эски меканды бузып кокысларын тасладылар, курыган тереклерди пыштылар, Нариман ман Терекли-Мектеб авыллар арасында тасланган кокысларды йыйыстырдылар.

– Бу ийги, пайдалы баславды биз хош коьремиз. Биргелес ялынлы ямагатлык исинде оьз коьлигин кулланган Залимхан Манкаевти, С.Муталлаповты, авыл участковыйы Алимхан Асановты, фельдшерлик-амбулаториялык пунктынынъ куллыкшысы Сакинат Тунгатаровады эм сондай баскаларды белгилемеге суьемиз.

Бу субботниктен алдын авыл яшавшысы Алимхан Бекманбетов коьлик тавып, кайбир авыл яшавшылар ман авылдынъ шетинде кокысты таславга шукырлар каздырып аьзирлегенлер, бирге тоьгеректи кокыстан тазалаганлар. Сол ийги аьдетти биз токтатпай, бардырып келмеге керекпиз. Келеекте тоьгеректи кокыслав, керексиз ерде малларды отлатув уьшин тийисли амаллары алынаяклар.

23-нши февраль куьнинде оьз ыхтыяры ман тувган ерининъ коьркине, шоьлининъ тазалыгына яны авырып субботниклерге шыкканларга авыл администрация аькимбасы Замир Байтемирович Суюндиков оьз карыж амалларына эки кой да алып берди, — дейди «сельсовет Коктюбинский» СП МО администрациядынъ аькимбасынынъ орынбасары Роза Таймасхановна Аджиева.

Элбетте, шоьлимизди, тувган еримизди тазалыкта саклавда бирлесуьв аьдетке кирип, аьр бир шоьл яшавшыдынъ бас борышларынынъ бириси болып калаягына сенимди йоймаймыз.

Г.Нурдинова.

Суьвретте: субботниктен коьринис.