Коьпйыллык намыслы иси уьшин

Буьгуьн хирургия боьлигине «Ногайская ЦРБ» бас врачы Фаризат Межитова, онынъ методикалык боьлигин уйгынлав бойынша орынбасары Зульфия Шугаипова, хирургия боьлигининъ баьри куллыкшылары, солай ок баска боьлик врачлары да келдилер. Олар Ынжибике Танъгатаровнага юрек туьбиннен шыккан йылы соьзлерин айттылар, гуьл байламлар, савкатлар тапшырдылар. Солай ок Фаризат Межитова шатлык иесине коьп йыллар узагына намыслы ислегени уьшин Сый грамота тапшырды.
– «Ногайская ЦРБ-дынъ» хирургия боьлигинде Ынжибике Танъгатаровна 1985-нши йылда ислеп баслаган, баслап 10 йыл узагына ол мунда «сестра-хозяйка» болган, сонъ санитаркага коьширилген. Мен туьнегуьн сизинъ ис китабинъизди актарып карадым, хирургия боьлигиннен алдын сиз «Ромашка» балалар бавында, тагы да баска организацияларда куллык эткенсиз. Мунда болса 33 йыл ислейсиз, ол аз зат тувыл. Сол шаклы йыл ишинде сиз неше бас врачлардынъ, куллыкшылардынъ авысканын коьргенсиз, кайдай авырувлыды да карагансыз, коьп яс куллыкшыларга оьз коьмегинъизди эткенсиз, маслагатлар бергенсиз. Ис йолдасларынъыздынъ, сизинъ дайым яйнаган, куьлемсиреген юзинъизге карап, коьнъиллери коьтерилген, куьшлери коьбейген десем оьтирик болмас. Оьз исинъизди намыслы эм коьримли толтыргансыз, буьгуьн сизди тийисли тыншаювга йиберемиз эм уьйкен савбол айтамыз, –деп «Ногайская ЦРБ» бас врачы Ы.Аджиевага берк ден савлык эм узак оьмир йорады. 

– Ислеген ерим – меним экинши уьйим. Ис йолдасларым меним экинши аьелим. Мага олар бек исси тиедилер, оларга мен де, олар да мага уьйренгенлер, не деп айтсак та, мен йогары коьнъил мен тыншаювга кетемен. Ислеекти иследим, йолдасларымнынъ аьр кайсысына да мен разыман. Оларга мен тавысымды катырып айтсам да, бир де соьз кайтармадылар, ясуьйкен деп сыйладылар, – деди Ы.Аджиева.

Хирургия боьлигининъ етекшиси Алим Зарманбетов та Ынжибике Танъгатаровна ясуьйкен соьзин айтып, бек пайдалы маслагатлар бергенин, ис йолдаслары ман да, авырыганлар ман да ийги тил тавып болганын белгиледи.

Солай ок, «Ногайская ЦРБ» етекшилевине шатлык иесининъ кызы Альфия Акимова коьп йыллар узагына анасына тирев болганына, буьгуьн эм дайым да сый эткенлерине савбол айтты.

Ынжибике-абайдынъ юзинде буьгуьн куваныш, разылык эм куьнъиртлик сезиледи. Куванышынынъ да, куьнъиртлигининъ де, разылыгынынъ да себеплери де, кимге каратылганы да белгили. Буьгуьнги йылы аьлде йолга салув онынъ сый-оьрметин, ийги аьдемшилигин шайытлайды.

Н.Кожаева.
Суьвретте: шарадан коьринис.