Туькенде ногай язувшыларынынъ китаплери айырым уьндирикке тизилген, суьвретшилердинъ суьвретлери, ногай йырлавшыларынынъ йырлары язылган дисклер сатылады, солай ок шаирлеримиздинъ, йырлавшыларымыздынъ суьвретлери илинген, уьйкен этип ясалган ногай тамгалар ярасыкланады.

– Бу туькенди 2009-ншы йыл меним аданасым ашкан эди, мен 2013-нши йыл Ногай районына келдим эм туькендеги савлай куллыкларды оьзим юриттим. «Ногайстан» деп ат берилген сонъ, туькенимиз оьз атына келисли болсын деп китаплер сатып басладым. Биринши сатылган китаплерим ногай шаиримиз Магомет Кожаевтинъ йыйынтыклары эди, онынъ енъил колыннан исим бек ийги кетти.

Оннан сонъ интернет туькен аштым. Эндиги ногай язувшылардынъ китаплерин интернет аркалы Турция элинде, Астраханьде, Крымда яшаган, элимиздинъ бас эм сырт калаларында ислеген ногайлар аладылар. Халкымыздынъ ваькиллери Ногай районыннан баска ерлерде яшасалар да, балалары оьз тилин билсин деген мырат пан бек коьп китаплер аладылар. Сол мени кувандырмай болмайды. Бек суьйиндиреди халкымыздынъ бир бирине ярдамласувы, яхшылык этуьви. Интернет туькен аркалы алынган китаплерди элимиздинъ бас эм сырт калаларына барганлар алган аьдемге еткерермиз деп тегин аькетедилер, почта ман мен айлак сийрек йиберемен, – дейди туькен иеси Асият Койлакаева.

Кайзаман туькенине кирсенъ де, куллык кайдай коьп болса да, Асият келген аьдемге куьлемсиреп, эс этеди. Кыскаяклы дайым аьрекетте, арувды-талувды билмейди. «Ногайстан» туькенди мен бир кишкей ногай элдей коьремен. Мунда азык-туьликлер де, ногайлар уьйинде оьзлери аьзирлеген пыслак, каймак, толтырма эм сондай баска затлар сатылады.

Тагы да мунда шайхана аьрекетлейди. Йолавшылар болсын, авыл аьдемлери, балалар болсын Асияттынъ зияпетлерин келип татадылар. Солардынъ сыраларында Асияттынъ асын татып, мундагы китаплерди актарып, суьвретлерине карап кыскаяклыдынъ эткен исине разы болганлар аз тувыл.

Н.Кожаева.

Суьвретте: А.Койлакаева.