Кенъесте Дагестан Республикасынынъ Халк Йыйынынынъ эм Ямагат палатасынынъ ваькиллери, министрлер,республикадынъ йогары окув заведениелерининъ эм кеспи билимлендируьв организацияларынынъ, муниципалитетлердинъ билимлендируьв управлениелерининъ етекшилери,педагоглардынъ, ата-аналардынъ ассоциацияларынынъ, билимлендируьв куллыкшыларынынъ профсоюзларынынъ председательлери эм баскалар ортакшылык эттилер.
Бас доклад пан ДР Оькиметининъ Председателининъ орынбасары, — ДР Билимлендируьв эм илми министри Уммупазиль Омарова шыгып соьйледи.
Вице-премьер педагоглардынъ кыйын акын оьстируьв, «Билимлендируьв» деген Миллет проектти яшавга шыгарув, школага дейимги билим алувды баьрине де еткеруьв, школада билим беруьвдинъ сапатын ийгилендируьв, талантлы окувшыларды белгилев эм коьтергишлев эм с.б. соравларда токталды.
Дагестан Республикасы 2018-нши йыл уьш федеральный проект бойынша федеральный бюджеттен субсидия алув бойынша конкурсты енъген. Соларды яшавга шыгарув бойынша республика 7,4 млрд. субсидия алаяк.
Оннан баска болып, ДР Билимлендируьв эм илми министерствосы тагы да бес федеральный проектте катнаспага аьзирленеди.
РФ Президентининъ «май айдагы указларын» толтырув эм балалардынъ савлайын да школага дейимги билим беруьв мен канагатлав мыратта 2018-нши йыл республикада 2 мынънан артык ерге эсапланган 20 балалар бавы кулланувга берилген. Сол куллык бардырылаяк. 2019-2021-нши йылларда республикада 1,5 ясыннан 3 ясына дейим балаларга 54 балалар бавы ашылмага каралады.
Школаларда уьш кезекли окувды тайдырув уьшин озган йыл республикада 24 школалар курылганлар, сонынъ ишинде курылысы узакка созылган 7 школа. Соны ман республикада аьли де 18 школалар уьш кезекли йосыкта куллык этедилер. Сондай школаларды йок этуьв бойынша 2019-2021-нши йылларда шаралар коьрмеге белгиленген.
Дагестан окувшыларын учебниклер мен канагатлав бойынша уьйкен куллык этилген. Бу йыл баслангыш класслардынъ окувшылары уьшин тийисли кадерде учебниклер алынган. Эндиги йыл уьйкен класслардынъ окувшыларын да учебниклер мен канагатлав каралады.
Балаларды окыйтаган ерине коьлик пен еткеруьв соравлары да оьткир турады. 2018-нши йыл республика школалары 140 автобуслар алдылар, ол да 2016-ншы йылдынъ коьрсеткишиннен 5 кереге артык.
Савлык ягыннан амаллары аз балалардынъ тийисли билим алувы уьшин хыйлы куллыклар этиледи. Сол куллыкларды яшавга шыгарув уьшин 68,6 млн. маьнет карыжланмага каралады.
Солай ок министр билим беруьвдинъ сапатын арттырув соравларында да токталды. Кенъестинъ барысында окытувшылардынъ кыйын акын коьтеруьв соравы айырым каралды.
Доклад бойынша регион Оькиметининъ Председателининъ биринши орынбасары Гаджимагомед Гусейнов, дагестанлы парламентининъ вице-спикери Елена Ельникова, Дагестан патшалык университетининъ ректоры Муртазали Рабаданов шыгып соьйледилер.
Ортага салып ойласувлар кутылган сонъ премьер-министр тамамларды келтирди. Онынъ айтувына коьре, 2018-нши йыл хыйлы куллыклар этилген.
«Билимлендируьв тармагында йыйылган маьселелер аьр кайсы яктан тергеп каравды талаплайтаган эди. Энди 2018-нши йылда етисилгенди йоймай, алдыга барув тийисли эм Россияда билимлендируьвди сав дуныяда ийги деген этпеге шалыспага тийислимиз»- деди Артем Здунов соьзин тамамлай келип.
Др Билимлендируьв эм илми министерствосынынъ коллегиясынынъ кенъеси ийги деген окытувшыларды эм балалар бавларынынъ куллыкшыларын ДР Оькиметининъ грамоталары ман савгалав ман тамамланды.
