МУРАТ АВЕЗОВ 

Ер юзинде алдын болган мынъ баьле.

Ер юзинде аьли де бар мынъ каста.

Ер юзинде болган дейлер мынъ маьлек

Эм тоьгилген бек коьп ашшы коьзяс та.

Тиймесин деп мынъ баьлединъ биреви,

Юкпасын деп мынъ кастадынъ биреви,

Сенсинъ мени коршалайган маьлегим,

Коьзи ясланмасын деген тилевинъ.

Сенсиз калып кайгырмага – коркаман.

Сенсиз калып авырымага – коркаман.

Куьналерден акланмага – коркаман.

Сенсиз калып, анам мен не боларман?

Алдын кезген болса ойым далада,

Энди дайым анам сенинъ акынъда –

Туьнде, танъда, уьйледе эм аксамда

Сагынаман сени кишкей баладай.

Мынъ баьлединъ тиерме деп биреви,

Мынъ кастадынъ югарма деп биреви,

Кыйланаман, маьлек болып болмайман,

Куьналери коьп аьвлеттинъ биреви…

Ер юзинде кутырады мынъ баьле,

Ердинъ юзин курытады мынъ каста.

Кылыплык пан кызыксынув катыста

Анам мага йол коьрсеткен ак маьлек. 

(Суьвреттинъ авторы - Мархаба Шалиева)