Керексинетаганлар уьшин янлары авырыйды

Ногай районынынъ имамы М.Атангулов, «Ногайский район» МР Депутатлар йыйынынынъ председатели Р.Насыров, муфтийдинъ биринши орынбасары А.Аджимоллаев шыгып соьйледилер. Озган йылдынъ ишинде коьплеген куллыклар этилинген. Рустам Атангуловтынъ айтувына коьре, азык-туьлик пен 215 аьдем канагатланган, медициналык коьмек 25 аьдемге этилинген, баьриси оларга 616 мынъ маьнет акша берилген. Турак-уьйди ийгилендируьв уьшин эки аьелге 11 мынъ 500 маьнет акша оьлшеминде ярдам этилинген. Районда атаанасыз калган 35 бала бар, оларга шаралар озгарувга 35 мынъ маьнет акша шыгарылган. «Закят эм садака» программа бойынша да ярдам этилинеди, былтыр 406 мынъ 172 маьнет садака берилген. «Рамазан шатыры» программасы бойынша 235 мынъ маьнет акша шыгарылган, мектебке бараяк оьксиз 48 балаларга 60 мынъ маьнет акша оьлшеминде ярдам этилинген. «Инсан» фонды ман парызлы программалардан баска саваплык программалар да бар. Мунда янъы яде кийилген кийимлер алув эм беруьв пункты ашылган, озган йылдынъ ишинде 140 аьелге кийим берилген. «Аьр бир ярлы аьелге – эт» программа бойынша Курман-байрам куьнлеринде 600 килограмм эт, солай ок 10 тонна карбыз эм 150 килограмм ералма пайланган. Балаларга яй тыншаювлар уйгынланган, спорт-савлык лагерьлерге тегин путевкалар берилген. 200 балага цирк билетлери алынган, баьри шараларда да балаларга таьтли зияпетлер пайланады, баьриси сол затка 8 мынъ маьнет акша шыгарылган. Баьриси саваплык программалар (парызлы программалардан баскалай) бойынша 1517750 маьнет акша шыгарылган. 2018-нши йыл саваплы аьдемлерден керексинетаганларга 3191422 маьнет акша оьлшемине келетаган буйымлары толтырылган. Саваплык этуьв – аьдемнинъ энъ де ийги касиети. Баьримиз де «Инсан» фонды ман бирге ийгилик этпеге шалысайык.

Г.Бекмуратова. Суьвретте: «Инсан» саваплык фонды ман ярдам этилген аьеллер.