Эм тагы мен сизге баскалардынъ кайгысын боьлисип, баскалардынъ суьйинишлерин юрегинъизге якын алганды сагынгым келеди. Сол заман сиз де баска биревге оьз кайгыларынъыз эм наьсибинъиз акында боьлисип хабарламага болаяксыз.
Бизге де, янъы йыл басланып, тувган газетамызды кызыклы этип, дуныя ярыгына шыгармага мырсат берди. Газетамызга язылганларга уьйкен савбол айткымыз келеди. Сизинъ коьмегинъиз бен биз «Шоьл тавысы» тувган газетамызды аьр ногай аьел алганына етисермиз. Онда сиз керекли материалларды тапсын уьшин оьз ягымыздан шалыскырлык коьрсетермиз. Биз – ашык газета: туьрли ой-кенъеслер, туьрли дискуссиялар уьшин. Сонынъ уьшин сизден хатлар куьтемиз: туьрли ой-кенъеслер акында. Сизден келген аьр хат – ол баьри тармакларда уьйкен маьселелерди шешуьвдинъ кишкей ашкышы.
Хатлар газета иштелигин ийгилендируьвге эм байытувга коьмек этеди, тоьменнен критика яйылувына себеплигин тийгистеди. Бир редакция коллективи де, уьйкен эм зейинли болса да, оьз борышларын ийги толтырып болмаяк, эгер авыл хабаршылар ман эм газета окувшылар ман тар байланыс тутпаса. Газета окувшылар хатларында – яшавды тереннен билуьв, олардынъ етиспевликлер мен разы болмавы. Хатларда бизим халктынъ ийги касиет белгилери ашылады: иске эм яратувшылыкка суьйимлик, аьдемшилик эм айтканыннан арт кайтпав, аваскерлик эм баьри затты билмеге ымтылув. Хатлар – янъы тынышсызландыратаган темалардынъ бай булагы, яратувшылык баславдынъ куйысы. Олар газетада маьнели маьселелерди (производстволык, маданият эм анъ-акыл яктан) салмага эп бередилер.
– Хатлар – бизим баспады янъы ой-токтаслар эм маслагатлар ман, яркын яшав оьзгерислер мен – азыкландыратаган таьвесилмес булак. Олар куьн аьлиндеги маьнели маьселелерге заманында эс каратпага, етиспевликлер мен уьстинликли куьреспеге коьмек этедилер. Бир-бир хатлар информациялык кепли: оларда автор кайдай ды болган зат акында кыскаша билдиреди. Бир ийги иске оьз ягыннан баа берип язады. Оьз сезимлерин, оьзгериске карасын билдиреди.
Янъы йылынъыз бан, аявлы газета окувшыларымыз. Сизинъ аьринъиз, бизим тек газета окувшымыз болып калмай, бизим дос-йолдасымыз боласыз. Сиз бар шаклы биз де бар.
Л.Уразаева,
«Шоьл тавысы» республикалык газетасынынъ яваплы секретари.
