Бизим Терекли-Мектеб авылымыздынъ Енъуьв атлы орамымыз оьзининъ данъклы атын совет халкынынъ гитлерши Германияды енъуьви мен байланыста юритеди. Орамда совет йылларында 20-дан артык Уллы Аталык согысынынъ ветеранлары яшаганлар. Буьгуьнлерде олардынъ дав кайратлыгын, согыс баьтирлигин ерге туьсирмей алып баратаган йигитлеримиздинъ барлыгы бизди куьезге эм оьктемликке толтырмай болмайды.

Элимиздинъ Савытлы куьшлерининъ сырасында аьлиги заманда Украина ерин нацистлерден босатув эм савытсызландырув ниет пен юритилетаган согыс операциясында Дагестан Республикасынынъ, сонынъ санында Ногай районымыздынъ ваькиллери де йигерли катнасадылар. Олардынъ баьриси де демеге болады мунда контракт бойынша ортакшылык этедилер.
Сондайлардынъ бириси – авылдасымыз Фазиль Кульчимаев. Ол 1991-нши йылда А.Джанибеков атындагы Терекли-Мектеб авылдынъ орта мектебин окып битирген сонъ, Черкессктеги технологиялык институтын кутарып, инженер-механик кесписин алган. 1997-нши йылдан 2007-нши йылга дейим Ногай районнынъ иш ислер боьлигинде, 2009-ншы йылдан 2012-нши йылга дейим ерли аьскер боьлигинде куллык этеди. Муннан сонъ ол контракт бойынша Россия аьскерининъ сырасына ислемеге кетеди. 2014-нши йыл Украинада болатаган ислерден сонъ, Крым Россия санына коьшеди. Сонынъ элимиздинъ сырасына кируьви мен байланыслы халк референдумы тынышлы кепте оьтуьвин канагатлав уьшин бизим аьскерлер ясыртын аьлде Крымга йиберилгенлер. Фазиль-алардынъ аьскер боьлиги Керчьте айырым операцияды толтырган эм оннан сонъ мунда орынласкан.
Быйылдынъ февраль айыннан алып, Украинада россия аьскерлерининъ согыс операциясы басланувы ман ол куллык этетаган аьскер боьлиги де сонда киргистилген. Янъыларда онынъ атасы Оразманбет пен анасы Апузар аьскер боьликтинъ командирининъ политика бойынша орынбасары Денис Богдановтан йылы хабар алганлар. Олай дегени, авылдасымыз Фазиль Кульчимаевке Россия Федерациясынынъ Коршаланув министрининъ буйырыгы ман «За боевые отличия» медали тапшырылган.
– Фазиль согыс операциясынынъ басыннан алып сонда бизим зенитно-ракеталы дивизионнынъ сырасында катнасады. Украин аьскерлери мен ол янъы таныс тувыл, неге десе аьли 2014-нши йылдынъ язлыгында ога Россия Савытлы куьшлери мен бирге Крымды элимиздинъ сырасына кайтарувда ортакшылык этпеге туьскен. Бу согыс борышын толтырувда ол белсенли катнасканы уьшин «Крымды алув уьшин» медали мен савгаланган. Аьлиги заманда да Фазиль минометлар эм ракеталар атувлары астында оьз йолдаслары ман бирге оьзлерине тапшырылган борышларды етимисли кепте толтырадылар. Ол ийги аьскерши, согыс дослыгына алал, оьз йолдасларына аьр заман да коьмекке келмеге аьзир, – дейди Фазиль акында Денис Богданов.
Авылдасымыздынъ акында сондай соьз- лердинъ айтылувы бизим баьримиз уьшин де уьйкен сый. Ол оьзи де ийги татым коьримли аьелде тербияланып оьскен. Биз ога эм согыс операциясын толтырувда катнасатаган баьри де ердеслеримизге, савлайы бизим армияга эмишликти эм уьстинликлерди йораймыз.
М.Ханов.
Суьвретте: Фазиль Кульчимаев.