Сергей Меликов Дагестаннынъ энъ де сырт еринде – Орта-Тоьбе авылында болды эм янъы салынган мектебти карады, авыл яшавшылары ман йолыгысты.
Россия Федерациясынынъ ортак билимлендируьвининъ сыйлы куллыкшысы, мектеб директоры Сапият Бекмурза кызы Межитовадынъ айтувына коьре, бу оьзгерис авылшыларга айлак та маьнели эм тарихли болады.
– Йогары конактынъ келуьвининъ бас ниети – янъы салынган мектебти коьруьв. Республикалык инвестиционлык программасы аркалы мектеб республика эм район етекшилерининъ коьтергишлеви мен салынды. Аьлиги талаплавларга келисетаган амаллар бизди суьйинтедилер, энъ де маьнели мектеб меканы коронавирус пандемиясы заманында Роспотребнадзордынъ бас деген талаплавларына келисли болганы, – дейди мектеб етекшиси. Сергей Алимович информатика, технологиялар кабинетлерине кирип карады, сол заман балалар онда ислеятыр эди, куьн сайын балалар, яй тыншаювларга карамастан, мектебке келедилер. Республика басшысы балалар ман соьйледи, коьп соравларга оьзи де яваплады. Сергей Алимович директордан мектеб курылысы бойынша маьселелер бар ма деген соравды берди.
– Биз Дагестан етекшисине ярасык мектеб уьшин савбол айттык. Бизим мектеб «Точка роста-2021» проектине киргистилген. Сергей Алимович бизди янъы проектлер мен кутлады, биз ога аьлбели бавымызды коьрсеттик, ол сейирсинди, бир кишкей заман ишинде кайтип сондай бав оьстирмеге болады деп. Дагестан Аькимбасы окытувшыларга эм окувшыларга уьстинликлер эм ден савлык йорады, – деп хабарлайды Сапият Бекмурза кызы. – Регион басшысынынъ бизим авылымызга келуьви – ийги хабар авылшыларга. Авыл яшавшылары Сергей Алимовичке авылдынъ ишинде этилинген ислери уьшин разылык билдирдилер. Олардынъ республика аькимбасына бир тилеги бар эди – Орта-Тоьбе эм Карагас авыллары арасында асфальт йолын салмага. Авыл ясуьйкенлерине регион басшысы кайтип йылувлык пан авылшылар ман соьйлегени бек ярады.
Орта-Тоьбе авыл орта мектеби Ногай районында ийги деген мектеблердинъ бириси болады.