Кизляр районынынъ аькимбасы Аким Микиров эм «Газпром газораспределение Дагестан» ООО етекшиси Ризван Газимагомедов ис йорыгы ман оьткен йолыгыста Кизляр районынынъ авылларын газификациялав соравларды ойласканлар.

Йолыгыста соьз авыл ерлерин газификациялав соравларын шешуьв уьшин федераллык оьлшеминде коьрилетаган шаралар эм Россия Президенти РФ Оькимети эм регионлар алдында салган борышлар акында юритилген. Олай дегени, йолыгыс катнасувшылары авылларды газификациялавдынъ туьз планын аьзирлев акында соравды ойласканлар.
Аким Микиров айтканлай, буьгуьнлерде Кизляр районы ериндеги 86 авылдынъ 31-ине эндиги де газ еткерилмеген. «Биз «Газпром газораспределение Дагестан» ООО ман бирге алдымызга салынган борышты шешермиз», – деген ол.
Ризван Газимагомедовтынъ соьзлерине коьре, уьстимиздеги йылдынъ сентябрь айыннан алып районнынъ баьри де авылларына газопроводты курув эм проект этуьв ислери басланады. Муннан сонъ авылларды газификациялав куллыклары юритилеек.
Соьйлесуьвдинъ барысында солай ок иеси йок болган газ тармакларынынъ 82 шакырымын канагатлав соравлары да ойласылды. Бу соравды шешуьвди «Газпром газораспределение Дагестан» ООО оьз мойынына алады.