Бизим халк ян-якка шашырап элимиздинъ коьплеген туьрли ерлеринде яшайтаганы баьрине де белгили.
Соьйтип, мине Шешен Республикасында коьптен бери доьрт, бес авылларында ногайлар ерлескенлер. Шелков районынынъ узак болмай, Воскресеновское авылында ногайлар эм шешен халкы тыпак яшап келедилер.

Воскресеновское авыл администрациясын ногай яс Арслан Сайпу увылы Акбердиев етекшилеп келеди. Онынъ себеплик этуьви мен уьстимиздеги йылдынъ коькек айынынъ 4-нши куьнинде бу авылда янъы мекан – фельдшер-акушерлик пункты (ФАП) оьз эсиклерин ашты. Янъы мекан кыска болжал ишинде ярасык этилип салынды. Фельдшер-акушерлик пунктында яс медиклер, айтпага, фельдшер Рудий Вараев, акушерка Милана Алимурзаева эм санитарка Жовзан Амойова намыслы аьрекет этедилер. Медициналык куллыкшылары авыл яшавшыларынынъ ден савлыгын беркитуьв эм саклав уьшин каратылган оьз ис борышын яваплы толтырмага шалысадылар.
Аьдемлерге сондай ярасык мекан – ол уьйкен куваныш эм куьез, олардынъ савлыгын эмлев уьшин, коьнъилин коьтеруьвге этилген яхшылык – уьйкен савап! Баьри де бек разы! Кишкей авылга уьйкен куваныш – савга!
Я.Дильманбетова.
Суьвретте: Воскресеновское авылында янъы салынган ФАП меканы.