Бабаюрт районынынъ Тамазатюбе авыл яшавшылары согыс спецоперациясыннан кесек заманга тыншаювга кайткан аьскершиси Джамал Алыпкачевти савлай авылы ман хош коьрип алдылар. Авылдынъ аьр бир яшавшысы ердеси уьшин оьктемлик эм суьйиниш сезимлерине толган эди. Яслардынъ колларындагы Россия эм Дагестаннынъ елпилдеген байраклары, юзлеген туьрли туьсли шарлары шара байрамына шатлыклы коьнъилин косты. Тамазатюбе авыл аькимбасы Махач Иманаджиев согыс спецоперация катнасувшысынынъ ата-анасы Динислам эм Наида Алыпкачевларга увылын тийисли кепте тербиялаганы уьшин, аьскерши Джамалга Элимизди коршалав бойынша етимисли кызмети уьшин разылыгын билдирди.
– Биз буьгуьнлерде Дагестаннынъ эм халкымыздынъ йигит увылын хош коьрип аламыз. Аталыгымыз оьз межелерин коршалавга йигерли увылларын шакырганда, Джамал бириншилерден алдышылыкка йолланды. Сондай йигитлеримиз ясларымызга уьлгили коьрим болмага тийисли, – деди Тамазатюбе авыл аькимбасы Махач Иманаджиев.
Суьвретте: СВО катнасувшысы Джамал Алыпкачевти хош алув аьсери.