24-нши ноябрьде Терекли-Мектеб авылынынъ Ф.Капельгородский атындагы паркында «Оьз терегинъди олтырт» деп аталган табиат акциясы болып озды.

Шарада Ногай район администрациясынынъ, авылдынъ ис коллективлери, окувшылар, солай ок Бабаюрт районыннан келген конаклар катнастылар.
Халк яратувшылыгы эм маданият оьрленуьв орталыгы алдында акциядынъ ашылувына багысланган митинг болып оьтти.
Шарадынъ катнасувшыларына эм конакларга каратылган саламлав соьзи мен район администрациясынынъ ваькили, финанс боьлигининъ етекшиси Арслан Кусегенов шыгып соьйледи. Ол районымыздынъ бурынгы паркында терек шашув оьз алдына айырым маьнели тарих оьзгериси болады деп белгиледи.
– Акциядынъ аьр бир катнасувшысы оьз коллары ман олтырткан тереклер уьйкен болып оьсип, аьр язлыкта япыраклары ман шувылдап, районымыздынъ яшавшыларын эм келген конакларды суьйинтсин эм бу куьн акында эстелик коьп йылларга саклансын, – деди Арслан Кусегенов.
Терекли-Мектеб авыл аькимбасынынъ куллыгын кесек заманга юритуьвши Вазир Аблезов бу куьнги акциядынъ маьнеси бек уьйкен эм керекли деп белгиледи. Ол бизим Бабаюрт досларымыз ийги ниет этип район паркына олтыртпага деп 70 шынар тереклерин аькелгенин билдирди.
Терекли-Мектеб авылдынъ асыл яшавшысы, район администрациясынынъ куллыкшысы Рустем Гапаров Бабаюрттан келген конакларга, авыл яшавшыларына акцияда катнасувы уьшин разылыгын билдирди. Соны ман бирге ол район орталыгынынъ янъы етекшилерине оьз аьрекетин мундай ийги ис пен баслаганы бек аьруьв ырым деп белгиледи. Р.Гапаров ызгы йылларда авылда хыйлы ийги ислер юритилуьви, район паркында янъы аллеялар, воркаут, балалар майданлары, киши футбол стадионы курылганы, эндигиси янъы орталык стадион курылып турганы акында айтты.
Бабаюрттан келген конаклар атыннан «Штамм» ООО директоры Залимхан Канбулатов шыгып соьйледи эм Терекли-Мектеб авыл паркы тек Ногай районында тувыл, сав Дагестанда уьйкен аьлемет парк экенин айырым белгиледи. Ол аьр бир аьдем табиаттынъ сондай эстелигин сакламага эм арттырмага керек деген ойын билдирди.
Муннан сонъ акциядынъ ортакшылары алдында «Карлыгашлар» балалар ансамбли, «Айланай» ансамблининъ солистлери концерт коьрсеттилер.
Шарадынъ тамамында сонынъ катнасувшылары паркта, янъы курылып турган стадион ювыгында яс шынар тереклерин олтырттылар.
М.Юнусов.