«Американ аьлимлерининъ билдируьви мен, грипптинъ 1918-нши йылда болганга усаслы янъы пандемиясы COVID-19 маразыннан да куьшли болаяк. Дуныя ога аьзир тувыл: бизде аьлиги вакциналар йок, а орта эм тоьмен келимли эллер кайдай да болсын вакциналарды сийрек болдырадылар, бай эллердинъ бойсынувы астына туьсип. Аьлиги орын тапкан аьллерде грипп вирусынынъ аьдем яшавына кавыфлы бу кеби ер юзининъ 33 миллион яшавшыларынынъ оьмирлерин кыскартпага болады». Мине сондай билдируьв коьзиме илинди СМИ бетлериннен эм эсиме бу юкпалы авырувдан ахырет дуныяга кетпеге калган куьнлерим туьсти.
Коьп аьдемлердинъ ден савлыгына уьйкен зарарлыгын тийгистти бу кавыфлы мараз. Билмеймен, кайда юктырдым мен бу авырувды, ама аьлиге дейим яным кыйналганы сезиледи. Уьш юма узагында туьсти мага бу коронавируслы инфекциясыннан эмленмеге ерли больницасынынъ стационарында. Мунда туьскен вакытта аьлим меним авыр эди: эт кыздырувынынъ оьлшеми оьсти, ас-сув бармай, тамакланув осалланды, тыныс алув авырланды… Коьп куьш-куватлык, кеспилик билимлерге негизленген усталыгын салдылар бизим медицина куллыкшылары мени аьне дуныяга йибермей аман калдырув уьшин. Коьп савболсынлар, ак юрегимнен разыман мен оларга: врач Динара Аккишиевага, медсестралар Наида Байгараевага, Наида Насыровага эм баскаларга кайдай авыр борыш толтырмага туьсти оларга авырувдынъ кутырган мезгилинде, уьй эсиклерин коьрмей, кеше- куьндиз «Красная зона» туьзилген куьнлерде аьрекет этип.
Врачлардынъ белгилегени мен толысынша эмленип, больницадан уьйиме шыктым эм бу куьнлерде карантин аьллеринде тураман, ама сеземен авырувдынъ яныма зорлыгын тийгисткенин: мен оьзи-оьзиннен, авыр куллык этпесем де, арыйман, бирерде шаркым сызлайды эм былшыр сувга туьскендей терлеймен, коьбисинше, мызгав аьлге туьсемен…
Бу кавыфлы инфекциясына карсы вакцинация иси юритилгенде , онынъ акында язылган ялган билдируьвлерге ынанып, прививка эттируьвден бас акаштым, оькинишке. Энди бу авырувдан коршаланувдынъ ялгыз бир амалы – вакцина ман тек ярым йылдан сонъ пайдаланып болаякпан. Сол заманга дейим бу авырувды тагы да юктырмагай эдим. Аьли заманымды уьйшиликте озгарып, коьлем аьдемлер болатаган ерлерге бармаска шалысаман, бизим аьдетлерге коьре бу яктан кайдай ды йорыкларга кесек заманга болса да бойсынмай.
Аьли сол авырув ман байланыслы авыр аьлден тегераннан басымды алаятып, мен баьрисине де заманында вакцинация процедурасын оьтпеге маслагат беремен, неге десе бу куьнлерде юкпалы эм ден савлыкка зарарлы коронавируслы инфекциялы маразыннан коршаланувдынъ ялгыз бир амалы – вакцинация. Коркпанъыз: элимизде шыгарылган вакцина аьдемнинъ ден савлыгына кавыфсыз. Ол зат бизим вакцина ман пайдаланатаган коьплеген шет эллер мен белгиленеди.
Тойбике Якубова, ДР Ногай районы бойынша ОПФР боьлигининъ куллыкшысы.
