– Яздынъ ызгы айында дуныяда коронавируслы юкпалы маразынынъ янъы толкыны коьтерилип баслады. Тек янъыларда авырыганлар саны азайганы ман, регионларда коронавируслы пандемия ман байланыслы тыйдажылыклар тайып баслаган эди. Оькинишке, аьдемлердинъ суьйиниши кыска болды, – дейди Ногай район орталык больницасынынъ врачтерапевти Солтанат Отовалиева.
– Вирус туьрленип, коронавируслы маразынынъ янъы штаммлары («кентавр», «ниндзя») шыгып басладылар. Тагы да авырувдан сакланув уьшин тынышсызланувлар тувды. Соны ман байланыста коронавирустан ревакцинация этуьвден тура сорав оьткир турды. Бу соравдан тура врачлар коронавируслы маразына карсы вакцинация яде ревакцинация керекли экенин айтадылар. Бирев де вакцинация яде ревакцинация коронавируслы маразыннан толысынша саклайды деп айтпайды, ама олар авырувды енъил этедилер, онынъ авыр аьлине коьшуьвиннен саклайдылар. Боьтен де авыр маразлылар, секерли диабет, юреклери авырыйтаганларга коронавируслы маразыннан сакланмага керек. Вакцина коьплеген аьдемлерге урылган, эгер вакцина янъы шыккан заманда аьдемлер иркилип, ойланган болсалар, аьли вакцинадынъ пайдасы белгили. Оны урдырган аьдемлер вакцина аркалы авырув енъил оьткенин анълаганлар. Бизим, врачлардынъ коьз алдында коьп ислер, коьп оьзгерислер, коьп тергевлер боладылар. Коьп зат бизим коьзимиздинъ алдында. Алдынгы йыллар биз коьп аьдемлерди йойыттык, солардынъ сырасында вакцинация эткенлер йок эди. Солай ок авырувы авыр аьлде оьткен, куьшли кыйналганлар да прививкады, кайдай да бир себеплерден, эттирмеген эдилер. Вакцинация эттиргенлер сырасында ревакцинация керегининъ яде керекли болмавынынъ акында сорав турады. Бир кесек заманнан сонъ, алынган вакцинадынъ куьши азаяды, сога коьре иммунитеттинъ авырувга карсы турмага куьшин коьтерер уьшин ревакцинация керек болады. Ревакцинация баска авырувлардан да этилинеди. Коронавируслы юкпалы авырувыннан ийги болганнан эм вакцинады алганнан 6 ай кеткеннен сонъ, ревакцинация этпеге болады. Ревакцинация уьшин биринши кере урылган вакцинадан баскасын урдырмага да ярайды. Эгер коронавируслы маразына карсы вакцинады урдырганнан сонъ этинъиз куьшли кызып, оьзинъизди осал этип сезген болсанъыз, ревакцинация уьшин терапевт пен бирге баска препарат сайламага боласыз. Аявлы Ногай район яшавшылары, оьзинъиздинъ эм касынъыздагылардынъ ден савлыгын ойлап, коронавируслы маразына карсы вакцинация, оны алганлар ревакцинация этинъиз, – деген шакырув этеди Солтанат Отовалиева.
