Элимизде коронавируслы юкпалы маразы ман авырыган аьдемлердинъ саны тагы да оьсип баслады. Вирустынъ янъы «Омикрон» штаммы куьшли яйылып туры. Коьп заман кетпей, Россияда авырувдынъ янъы толкыны басланаяк деп билдириледи. Бу йол авырув боьтен де куьшли болаяк деп белгиленеди. Соны ман бирге тынышсызланув да оьседи. Бу куьнге авырувдынъ яйылувыннан сакланувдынъ энъ де пайдалы амалы вакцинация. Сонынъ акында коьп язылады эм айтылады. Врачлардынъ берген маслагатларына, шакырувларына карамастан, вакцинация бойынша халк арасында коьп соравлар тувады. Вакцинация эм авырувдынъ яйылувыннан сакланув амаллар акында биз оьз соравларымызды Ногай район орталык больницасынынъ врач-эпидемиологы Аклима Нургушиевага (суьвретте) беремиз.
– Аклима Зиявдиновна, бас деп сизге уьйкен разылык билдирмеге суьемиз. Мундай кыйынлы заманларда Ногай район орталык больницасынынъ баска врачлары ман бирге оьзинъиздинъ савлыгы- нъызды сынавга салып, коронавируслы юкпалы маразлы аьдемлерге ярдам этуьв исин бардырып турганынъызга.
Коронавирустынъ янъы «Омикрон» штаммынынъ баскалыгы акында айтып озынъызшы.
– «Омикроннынъ» баскалыгы, баска штаммлар ман тенълестирип караганда, авырув енъил оьтеди, ама оны кавыфсыз деп санап, парахатланмага ярамайды. Авырувдынъ яйылувыннан сакланар уьшин вакцинация алмага керек, солай ок коьп аьдемлер йыйналатаган ерлерге бармаска шалыспага, маска тагып юрмеге керек. Эгер аьдем авырыса, маразды баскаларга яймас ниетте, уьйинде олтырмага тийисли. Коронавирустынъ бу штаммы айлак куьшли тез яйылувы ман да баскаланады.
– Бу куьнлерде Ногай район орталык больницасында пневмония эм коронавируслы юкпалы маразыннан эмленуьвде ярдам алган аьдемлер саны калай?
24-нши январьге Ногай район орталык больницасында пневмония эм коронавируслы маразлы 28 аьдемге ярдам этилинеди. Олардынъ сырасында коронавирусы 6 аьдемде бар деп аянланган. Амбулаторлы кепте 70-тен артык аьдем эмленеди. Олардынъ сырасында болса 68 аьдемде коронавирусы бар деп аянланган.
– Ногай районында вакцинация бойынша аьллер кайдай?
– Ногай районында коронавируслы юкпалы маразына карсы вакцинацияды 8 249 аьдем алган. Ол прививка алмага болатаган аьдемлердинъ 78,7 проценти болады. Ревакцинацияды 709 аьдем оьткен.
– Коронавируска карсы вакцинация ден савлыкка зарар келтирмеге болама?
– Оькинишке, элимизде, солай ок Ногай районында вакцинация алмага шекленген аьдемлер аз тувыл. Вакцинация ден савлыкка зарарлы тувыл. Бу куьнге дейим, коронавируслы маразына карсы прививка алган аьдемлер сырасында олардынъ ден савлыгына зарар келтирилгени аянланмаган.
– Коронавируслы маразы ман авырып, савболганларга вакцинация этпеге керекпе?
– Савлык саклавынынъ савдуныялык организациясынынъ белгилевине коьре, коронавируслы юкпалы маразыннан савболган аьдемлер вакцинация алса яхшы. Ама олар прививкады алганша, авырыганнан сонъ 2-3 ай оьтпеге керек.
– Вакцинация алган аьдемлер COVID-19 маразы ман авырыйдыларма?
– Прививка урдырганлар коронавируслы юкпалы маразы ман авырымага боладылар, ама оларда авырув енъил оьтеди. Бизим врачлардынъ тергевлерине коьре прививка урдырганнан сонъ аьли де 6 ай кетпей, аьдем авырыса, онда мараз енъил оьтеди. Эгер, ол прививкады алганнан сонъ, ярым йыл озган болса, бириншилей айткан ман тенълесте, авырув авыр оьтеди.
– Прививкады урдырмага токтаган аьдемлер кайсы вакцина ийги экен деп ойланадылар?
– Бизим районга Гам-КОВИД-Вак эм ЭпиВакКорона вакциналары аькелинеди. Олар экеви де пайдалы. Вакциналардынъ пайдалыгы тергелген.
ЭпиВакКорона вакцинасы эсли, 65 ясыннан озган, иммунитети айлак берк болмаган аьдемлерге келисли.
– Вакцинация алган сонъ аьдемнинъ эти кызса, не этпеге керек?
– Прививка урдырган сонъ, аьдемнинъ эти кызбага, ол авырысынмага да болады. Амал болса, дарман ишпей шыдаган ийги. Эгер эт кызув 38 -39 градустан йогары коьтерилсе, парацетомол яде ибупрофен ишпеге керек. Эт кызув дарман ишкеннен сонъ да тоьмен туьспесе, уьйге врачты шакырынъыз.
Ногай районынынъ яшавшылары! Мен сизди вакцинация оьтпеге шакыраман. Вакцинация оьтип, биз тек оьзимизди тувыл, касымыздагыларды да коршалаймыз. Вакцинация бизге алдынгы, пандемияга дейим яшав йорыгына кайтпага ярдам этер.
Н.Кожаева хабарласувды юриткен.
