Ызгы заманларда янъы коронавирус юкпалы маразы элимиз, сонынъ санында республикамыз бойынша тагы да яйылып барады. Сондай аваралы заманларда бизде бу мараздан сакланувдынъ бир неше йорыклары бар, ама солардынъ ишинде энъ де пайдалысы – вакцинация эттируьв.

Ногай район администрациясынынъ согыс, ис эм ыхтыяр саклавшы органларынынъ ветеранлар советининъ председатели Акманбет Муса увылы Сангишиев мараздынъ таралувы ман байланыста оьз ойы ман боьлисти.
– Мен оьзим вакцинациядынъ эки де кезегин оьттим. Мен аьли 72 ясымда, болса да, эсли болганыма да карамастан, бу прививкады аьруьв кепте оьттим. Сонынъ акында аьлиги заманда Интернетте не туьрли мифлер эм коркынышлы хабарлар таралып турадылар. Вакцинадынъ бир осал затын яде зарарын да коьрмедим, дурысында, солар болма да болмагандыр.
Буьгуьнлерде элимизде эм дуныяда коронавирус юкпалы маразы янъыдан таралып турганда, мен оьзим мен яслы аьдемлерге, ясларга вакцина суктырынъыз деп оьз ойымды маслагат этпеге суьемен. Сол зат бу зарарлы авырувдынъ армаган яйылувын иркер, сизге оьзи-нъизди, аьеллеринъизди, кардаш-тувганларынъызды коршаламага амал берер. Эсинъизде болса, былтыр биз не шаклы ювыкларымызды, тенълеримизди, авылдасларымызды йойдык, неге десе бу юкпалы мараз кылыплы эм кавыфлы.
Тагы бир соравды коьтермеге суьемен. Куьн сайын бизге Интернет амаллары ман айырым медик-лердинъ, профессорлардынъ, академиклердинъ коронавируска карсы вакциналардынъ зарарлы экени акында видеошакырувлары келип турады. Бу ялган информация булагына кайтип болса да карсылык этпеге, бизим «Спутник V» вакцинасы акында коьримли аьлимлердинъ, врачлардынъ, чиновниклердинъ шыгып соьйлевлерин уйгынламага ярамайма экен? Аьдемлерге, вакцинага карсы юритилип турган агитациядан тура, арасува болып, бир ойга келмеге авыр болады, – деди газетадынъ оьз хабаршысына Акманбет Сангишиев.
М.Юнусов.
Суьвретте: А.Сангишиев.