Коронавирус юкпалы маразды тек коьлем вакцинация амаллары енъмеге болады деп билдиргенлер Роспотребнадзор пресс-службасында.

«COVID-19» – бек кавыфлы эм авыр юкпалы мараз, ол авырувлы уьшин бек осал болып кутылмага болады. Сол себептен инфекционистлер мен эпидемиологлардынъ ойлары бир: коронавирусты тек вакцинация толысынша енъмеге болады», – деп белгилегенлер ведомствода.
Вакцинады язда суктырган бек маьнели, соьйтип аьдемлер ОРВИ, грипп эм баска туьрли ава-тамшы йоллар ман югатаган авырувлар коьбеетаган куьз-кыс айларына аьзирленмеге амал табадылар деп косадылар Роспотребнадзорда.
Соны ман бирге яз айлары – ол аьдем оьз ден савлыгын эм иммунитетин аягына тургызатаган эм беркитетаган заман деп саналады, неге десе бу шак витаминлерге эм микроэлементлерге бай болган ясылшалар ман емислерге толы, аьдемлер коьп заманын уьй ишинде тувыл, кырда таза авада оьткередилер.
«Коронавируска карсы вакциналарды суктырмаса, сондай юкпалы авырувлар йыйы эм коьлем аьлде таралып тураяклар. Юкпалы мараздан эм пандемиядан кыска заман ишинде оьткерилетаган коьлем вакцинация коршаламага болаяк. Тек сондай аьлде коршаланган аьдемлер саны коьбейгенде, вирустынъ бир аьдемнен баскасына коьшуьви де токталады», – деп анълатканлар ведомствода.
Буьгуьнлерде элимиздинъ регионларында «Спутник V», «ЭпиВакКорона» эм «КовиВак» вакциналары ман прививка эттирмеге болады. Быйыл май айынынъ басында тагы да доьртинши «Спутник Лайт» вакцинасы да шыкканы эсапка алынган.