Ногай районында йылдан артык заман авырыган аьдемлердинъ саны 1938 деп белгиленген: олардынъ ишиннен коронавирус пан авырыганлар – 1224 аьдем, пневмония ман – 714 аьдем.

Буьгуьнлерде 82 аьдем – стационарда, 198 COVID-19 пен авырыганлар амбулаторлы эмленедилер. Савболганлардынъ саны – 899 аьдем, пневмония ман зарарланганлар – 734 аьдем. Яйылув маразынынъ басыннан алып 26 аьдем ян берген, олардынъ 19-зы – коронавирустан, 7 аьдем пневмониядан тайганлар.
Уьстимиздеги йылдынъ басыннан алып 15 аьдем тайганлар. 70 аьдем баска медициналык организацияларына эмленмеге йиберилгенлер. Терекли-Мектеб авылындагы район поликлиникасында прививка этилинетаган кабинет ашылган. Онда савлайы 5250 доза вакцинасы аькелинген, олардынъ 150 – Эпивак Корона эм 100 – Спутник Лайт. Уьстимиздеги йылдынъ сары тамбыз айынынъ 24-нши куьнине савлайы 4695 аьдем вакцинадынъ биринши кезегин оьткенлер. Районда вакцина этилмеге керек ясуьйкенлердинъ саны – 10472 аьдем. Солардынъ ишиннен тек 44,8% вакцинацияды оьткенлер.
Район орталык больницасында авырыганларга деп 85 ятар орынлы госпиталь ашылган. Буьгуьнлерде госпиталь авырыганлар ман толган. Район администрациясы авыл аькимбаслары ман биргелесте район больницасын заман-заманы ман кислородты еткеруьв уьшин коьлик пен эм ягарлык пан канагатлайдылар. Коьп авырыганлар кислород пан пайдаланганнан себеп, госпитальде сутка бойынша 10-11 баллон кислороды кулланылады.
Район авылларында вакцинация ман байланыслы аьл бек осал демеге болады. Айтпага, Карагас авылында вакцинация этилинеек 950 аьдемнен – тек 225, Уьйсалганда 100 аьдемнен – 21, Карасу авылында 385 аьдемнен – 70, Шумлеликте 410 аьдемнен – 118 аьдемлери вакцинация эткенлер. Вакцинацияды, коьбисинше, учреждениелер, организациялар, окытувшылар, врачлар, балалар бавларынынъ эм социаллык службаларынынъ куллыкшылары эттиредилер.
Баска болып, район бойынша 60 ястан озган 3113 аьдемлериннен савлайы 553-нши прививка эттиргенлер. Бу сан авырыганлардынъ эм оьлгенлердинъ коьбиси ясуьйкенлер болган себептен бек тоьмен экенин коьрсетеди.