ДР Савлык саклав министерствосынынъ пресс-службасы билдиргенлей, аьли республикамыздынъ больницаларына внебольничная пневмония ман эм коронавируслы юкпалы маразлы деп шек тувдырган 100-ден артык авырыган аьдем туьскен.

ДР Савлык саклав министерствосынынъ етекшиси Татьяна Беляевадынъ соьзлери мен, мундай аьллер озган йылдынъ коькек айынынъ басында туьзилген болган. Оны сол санлар тынышсызландырадылар, больницада косымша ятар орынлар аьзирлемеге керек болмага болады.

Уьйкен несилди сакламага тийисли, ама авырыганлар сырасында яслар да бар.

Ызгы юма ишинде республикалык больницага 564 авырыганлар туьскен, 411 аьдем ийги болып больницадан уьйине кайткан, 408 аьдем амбулаторлы кепте эмленеди.
ДР Савлык саклав министерствосы авырыганларга, тез арада врачка бармага эм кавыфсызлык амаллар тутпага маслагат этеди.

Ногай районында курал айынынъ 26-ншы куьнине, Ногай районы орталык больницасында пневмония ман авырыган 4 аьдем медицина ярдамын алады, коронавируслы юкпалы маразлы 7 аьдем уьйинде эмленеди. Ногай районы бойынша баьриси 1210 аьдем коронавируслы юкпалы маразына карсы прививкады алган. Онынъ экинши компоненти 780 аьдемге этилинген.