Янъыларда бизим газетамыздынъ редакциясына Хасавюрт каласыннан краеведение эм туризмининъ Москвадагы халклар ара балалар-оьспир академиясынынъ командири, Дагестан Республикасындагы ТОКС етекшиси Болатхан Халилулаевич педагогикалык окув ошагынынъ студентлери атыннан алдын сол окув ошагын окып кутарганларга оьз ойлары ман, эскеруьвлери мен боьлисуьвди тилейди.

Сол тилек босына этилмейди, неге десе уьстимиздеги йылдынъ куьзинде Хасавюрт педагогикалык окув ошагы ашылганлы эм биринши кеспили окытувшыларды аьзирлеп баслаганына 90 йыл толады.
Бу окув ошагынынъ ашылувы, кеспили специалистлерди аьзирлеви бизим ногай халкымызга бек уьйкен пайда аькелген. Ногай район билимлендируьв тармагынынъ оьрленуьвине сол окув ошагын окып битиргенлер оьз косымларын эткенлер эм салдарлы етимислерге де етискенлер. Оьзлериннен сонъ да бир неше окытувшылар несиллерин аьзирлегенлер. Бу куьнлерде Хасавюрт педагогикалык окув ошагын окып битиргенлер ишинде – Россия Федерациясынынъ эм Дагестан Республикасынынъ ат казанган не шаклы да коьп алдышы окытувшылар.
Сонъында сол ок окув ошагынынъ филиалы Ногай район орталыгы Терекли-Мектеб авылында да ашылды. Мунда да бир неше юзлеген кеспили окытувшылар аьзирлендилер. Солар бу куьнлерде оьзлерининъ терен билимлерин оьзлерининъ тувган еринде, сырт якларда, кыскаша айтканда, элимиздинъ кайсы еринде де берип, яс несилди тербиялап келедилер. Оьз эскеруьвлеринъизди Хасавюрт педагогикалык окув ошагына йибермеге эм бизим газетамыздынъ бетлеринде де боьлиспеге боласыз. Окув ошактынъ тарихинде ногай халкынынъ да косымы бар.