ДР Халк Йыйынынынъ депутаты, КПРФ Дагестан рескомынынъ секретари Мурзадин Авезов Бабаюрт районынынъ Татаюрт авылында кеспили боксер, кикбоксер, тайский бокс бойынша Россия чемпионы, дуныя чемпионатынынъ ез медалининъ, Россия, Европа дуныя кубокларынынъ иеси, дуныя бойынша шеккиси авыр боксерлар арасында энъ куьшлилердинъ бириси (ТОП 120) Арслан Яллыев пен йолыгыскан. Белгилеп озув керегеди, Арслан Яллыев оьз шекки категориясында 12 йолыгыс озгарган эм биревинде де енъилмеген, аз десенъиз, солардынъ 5-инде оьз куьндеслерин нокаут йосыгы ман енъген.

Мурзадин Авезов айтылган спортсменге Разылык грамотасын тапшырган. Сол Разылыкта: «Дуныя оьлшеминде етисилген спорт уьстинликлери, яс несиллер арасында физкультура эм яшавдынъ савлык кебин таралтувы, ногай халкын данъклатувы уьшин», – деп язылган. Соны ман бирге боксерга КПРФ спорт атрибутикасы да берилген.
Йолыгыста Татаюрт авылынынъ ямагат ваькиллери – ис, билимлендируьв ветеранлары, спорт активистлери катнасканлар. Депутат Авезов йыйылганлардынъ соравларына яваплаган эм элдеги, республикадагы социал-экономикалык эм ямагат-политикалык аьллер акында билдируьв эткен.
Авыл яшавшылары оьз ягыннан Мурзадин Авезовка 2018-нши йылда Тамаза-Тоьбе – Татаюрт авыллары арасында автойолды ярастырувга ярдам эткени уьшин разылык билдиргенлер. Солай ок олар депутатка Татаюрт авылында балалар бавын курмага коьмек этпеге тилек салдылар. Йолыгыста Арслан Яллыевтинъ Ногай районынынъ яшавшылары ман йолыгыспага макуллыгы алынган. Йолыгыстынъ ызында Мурзадин Авезов яс спортсменге янъы уьстинликлерди йораган.
КПРФ Ногай РК пресс-службасы.
Суьвретте: М.Авезов эм А.Яллыев.