Ногай район администрациясынынъ кенъеслер залында район Депутатлар йыйынынынъ 56-ншы сессиясы болып оьтти.
Сессияда Ногай район Депутатлар йыйынынынъ председатели Рустам Байманбетов, ерли парламенттинъ дайымлык негизинде депутаты Рашид Шангереев, район прокуратурасынынъ куллыкшысы Сталинбек Абдуллаев, депутатлар, бир неше авыл поселение аькимбаслары катнастылар.
Район депутатлары сессияда 2022-нши йыл уьшин Россия МВД-нынъ Ногай районы бойынша боьлигининъ ис аьрекетининъ сырагылары акында соравды ойластылар. Сонынъ акында эсап беруьв доклады ман район иш ислер боьлигининъ етекшисининъ орынбасары Исламбек Янполов шыгып соьйледи.
Онынъ айтувы ман, озган йыл узагында район бойынша эсапка алынган кыянатлыклар оьлшеми тоьменлеген. Сол кыянатлыклардынъ да 94 проценти ашылган, 5 кыянатлык аьли уьшин ашылмаган. Исламбек Янполовтынъ соьзине коьре, авыр кыянатлыклар саны да тоьменлеп барады. 2021-нши йылда сондай 30 кыянатлык болган болса, 2022-нши йыл – 25 кыянатлык болган деп эсапка алынган. Уголовлык кыянатлыклар саны да район еринде 2021-нши йылда 108 болганы белгиленсе, оьткен йыл 76 кыянатлык болган деп коьрсетилген, солардынъ 71-и ашылган. Экономика тармагында былтыр 20 кыянатлык болып озган болса да (2021-нши йылда – 18) солар баьриси де 100 процентке ашылган (тенълестируьв уьшин: сондай кыянатлыкларды ашув саны республика бойынша 89,6 процентке етиседи).
Соны ман бирге докладшы район яшавшыларынынъ йылдан-йылга электроэнергияды кулланганы уьшин акын тоьлев борышы оьсетаганын белгиледи. Бу ягыннан коьрилетаган шаралар аьлди ийгилендирмейдилер.
Район иш ислер боьлигининъ етекшисининъ орынбасары солай ок районнынъ эгин кырларынынъ биревлеринде целлофан кагытлары толганы акында соравды да козгады. «Участковыйлар аьр бир авылда айырым куллык юритсе де, сол ис бу соравды толы кепте шешпейди. Сонынъ уьшин авыл аькимбаслары эгин кырлардан целлофан кагытларын йыюв куллыкты янландырмага тийисли», – деди И.Янполов. Ол авыл аькимбаслары вайымсыз арендаторлардан олардынъ ер участокларын судтынъ аркасы ман кайтарып алмага болатаганын билдирди.
Район Депутатлар йыйынынынъ председатели Р.Байманбетов докладшыга район автойолларында кателерди азайтув, ясы етпеген оьспирлер арасында кыянатлык саны оьсуьвининъ алдын шалув, Куьнбатар авылында кулланувга берилген янъы маданият уьйининъ тамлары ярылувы, Карагас авылда янъы казылган артезианнан сув келмеви мен байланыслы соравлардынъ калай шешилуьви акында сорады. И.Янполов соравларга тийисли яваплар кайтарды.
Докладты ойласып болган сонъ, район депутатлары 2022-нши йылда район иш ислер боьлигининъ юриткен куллыгына тийисли белги бердилер.
Сессияда оьз ойларын район прокуратура куллыкшысы С.Абдуллаев, район депутаты О.Шахбанов айттылар.
М.Юнусов
