Россия Президенти Владимир Путиннинъ аьскер борышын толтырмага тийисли гражданларды мобилизация этуьв акында россиянлыларга янъыларда каратылган Шакырувын буьгуьнлерде элимиздинъ ямагаты кенъ ойласады.
Россия Федерациясынынъ Конституциясына коьре, аьр бир гражданин Тувган Элин коршаламага борышлы деп белгилейди Ногай районынынъ Савытлы куьшлер эм ыхтыяр саклавшы органларынынъ Ветеранлар советининъ председатели Акманбет Сангишиев (суьвретте).
– Буьгуьнлерде Украинады денацификация эм демилитаризация этуьв бойынша юритилетаган специальли согыс операциясы Донбасстынъ эм Лугансктынъ яшавшыларынынъ кавыфсызлыгын канагатлавга каратылган, солай ок биз билдирилген мобилизация ислери мен оьз элимиздинъ кавыфсызлыгын канагатлаймыз.
Мен ДНР эм ЛНР эм баска областьлердинъ Россия Федарациясына кируьви бойынша референдум оьткеруьв идеясын толы кепте яклайман. Бу ерлер аян россия ерлери эм сонда Россия халкы яшайды. Совет власти янъы токтастырылган оьткен оьмирдинъ 20-ншы йылларында бу орыс ерлери ол замандагы Совет Украина сырасына берилген. Болса да Совет Союзы бузылган сонъ, 90-ншы йыллардынъ басында бу айтылган областьлер мен Крым, 1991-нши йылдынъ 17-нши мартындагы савлайхалклык референдумнынъ сонда элимиздинъ яшавшыларынынъ 70 проценти, сонынъ санында Донбасстынъ эм Лугансктынъ яшавшылары да, элимиздинъ бирлиги эм боьлинмеслиги уьшин тавысларын беруьвине де карамастан, Украинага берилген. Буьгуьнлерде сол истинъ артында США эм НАТО эллерининъ ясыртын «дирижерлары» болганы баьрине де анъламлы. Бизим заманымызда олар Украина ерлерин Россияга карсы плацдарм этип, а украина халкын россия яшавшыларына карсы кулланадылар.
Сонынъ уьшин де сонда буьгуьнлерде бизим Аталыгымыздынъ, бизим ердеслеримиз – ДНР эм ЛНР яшавшыларынынъ, соны ман бирге сав дуныямыздынъ бактысы шешиледи, неге десе Россия кайсы заманларда да сав дуныяда тынышлыкты яклавшы эм саклавшы деп белгили. Сол себептен бизге Президентимизди якламага эм онынъ тоьгерегинде тыпакласпага керек болады.
Эндигиси толы болмаган мобилизациядан тура. Бизим аталарымыз эм атайларымыз 1941-нши йылда Тувган Элимизге душпан шапкынлык эткенде соны коршалаганлар. Буьгуьн де душпан капымыздынъ алдында туры. Соны ман байланыста бизим атаклы аталарымыздынъ уныкларына эм немерелерине Тувган Элимизди коршалавга турмага заман келди. Мен оларга тез енъуьвди эм аман-эсен уьйлерине кайтувды йорайман, – деди Акманбет Сангишиев бизим хабаршымызга.
