Амин Азиз увылы Темирбулатов мага айлак кишкей заманыннан алып таныс болды (ол меним кызым ман бир «Юлдыз» балалар бавына юрип баслады, сонъында бир класста да окыдылар). Балага караганлай ок, онынъ ойшанъ, аьр бир янъы затка тергевши карасы ман караганы сенинъ назарынъды токтатаган эди десем оьтирик болмас. Сондай яркын юзи болган, аьр янъы затка уьйкен кызыксынувы болган саьбийдинъ келеекте терен билими болаягына шекленмеге де керек тувыл эди.
Касиетине коьре, мен Амин кайдай кеде деген соравга, бек каьмбил аьдем деп айтар эдим.
Аьлиги заманда биз Амин Азиз увылы Темирбулатов акында коьп ийги соьзлер эситемиз. Онынъ мектеб сабаклары ишинде осал билетаганы йок деп айтпага болады, болса да, ол айырым уьстинликлерге – эсап сабагы бойынша етиседи.
Ол баслангыш классларда окыган заманларында да туьрли олимпиадаларда катнасып, савгалы орынларга етисетаган эди. Оннан сонъ, мектебтинъ орта кезегине коьшкенде, онынъ алдында уьйкен йоллар ашылдылар. Амин туьрли олимпиадалардынъ тек мектеб кезегинде тувыл, район, республика кезеклеринде де уьстинликлерге етискен.
Аьли Амин Темирбулатов Дагестан Республикасынынъ «Оьнерли балалар орталыгы» деген лицей-интернатынынъ 9-ншы классынынъ окувшысы болады. Сол окув йылларынынъ коьбисинде ол бир неше кере физика сабагы бойынша Савлайроссиялык окувшылар олимпиадаларынынъ муниципаллык, регионаллык кезеклерининъ енъуьвшиси болды. Математика сабагы бойынша Пифагор атындагы олимпиадасында да йогары уьстинликлерге етискен, Чебышев атындагы олимпиадасынынъ финаллы ойынына да шыккан болган.
Амин бек оьнерли бала, ондай аьдемлерге «коьзден, тилден Алла сакласын» деп тилек тилеп турмага керек. Армаганда биз оны оьз миллетимиздинъ бир аьлими болар деген сенимди алдымызга саламыз.
Суьйинеди онынъ куьнле-куьнлик уьстинликлерине аясына салып, аявлап оьстирген энеси Сыйлыхан, аьдуьвлеп, туьн уйкысын дорт боьлген, анасы Зульфира.
Амин: «Мен тек эсап эм сога ювык сабакларды суьемен», – деп, баска сабакларга ушкары карайды демес эдим, онынъ Россия Федерациясынынъ юстиция министерствосы ман озгарылган, «В мир права» деп аталган обществознание сабагы бойынша олимпиададынъ регионаллык кезегинде де етимиси бар.
Уллы Паустовскийдинъ: «Оьз тилин суьймеген аьдем – кийик, онынъ аьлигиси де, келеектегиси де йок», – дегенин эсимизге аламыз. Солай да болар, эгер аьдем оьз тилин уьйренуьвден басламаса, кайтип оьзининъ менлигин коьрсетпеге керек. Аьли Амин коьпмиллетли Дагестан Республикасынынъ бас каласында оьзининъ окувын бардырады, ол оьзининъ тувган ногай тилин де бек аьруьв биледи эм баска миллетлер алдында ногайдынъ ким экенин айтып та, керек ерде атын яклап та болады.
Ногай тили бойынша да ол олимпиададынъ район кезегинде савгалы орынды алган заманы да бар эди.
Амин язгы тыншаюв куьнлерди де босына йибермеди. Ызгы доьрт ай ишинде ол «Альтаир» атлы оьнерли балаларды ашыклав регионаллык орталык пан физика сабагы бойынша озгарылган олимпиадада катнаскан эм савгалы биринши орынга тийисли болган дипломды алган. Аьли уьшин ол Дагестан Республикасыдынъ физика бойынша йыйылма куьбининъ агзасы болады.
Аминнинъ окувдан баскалай аьвлигетаганы –шатраш ойыны. Бу ерде де онынъ етимиси бар. Айтпага, ол «Белая ладья» шатраш турнирининъ регионаллык кезегинде оьзининъ тапкырлыгын эм билимин коьрсеткен.
Мине сондай бизим Амин Темирбулатов. Келеекте мен яс йигитимизге тек алдыга оьсуьвди эм уьстинликли етимислерди йорайман.
Яшасын ногай халкым, оьссин соны ман бирге бизимбилимли яслар сыралары. Олар бизим уьйкен сенимимиз болады.
Г.Сагиндикова,
РФ Журналистлер союзынынъ агзасы.
Суьвретте: А.Темирбулатов.
