Янъыларда Кизляр районынынъ Краснооктябрьское авылынынъ яшавшысы Газимагомед Газимагомедовка «Кавказдынъ халк баьтири» деген сыйлы аты берилди эм «Алтын Юлдыз» медали тапшырылды.

Савгаларды Кизляр район администрациясынынъ аькимбасынынъ орынбасары Тимур Гаирбеков тапшырды. Газимагомедовтынъ эткен ак ниетли ислерининъ сырасын коьплеген саваплык акциялары, керексинетаган эм авыр аьллеринде болган аьеллерге, картлыкта ялгыз яшайтаган гражданларга, етим саьбийлерге ярдамласув, баска болып, йоллардынъ, межигитлердинъ курылысы туьзедилер.
«Бизим баьтиримиздинъ акында документальлик фильмлери туьзилгенлер эм буьгуьнлерде де туьзилип келедилер. Онынъ этип келетаган ак ниетли ислери акында Россиядынъ кайсы муьйисинде де белгили болды. 2022-нши йылдынъ тамбыз айында Дагестаннан йиберилген уьйкен гуманитарлык юги мен барып, Запорожский областининъ Бердянск каласында Газимагомед Исмаилович уьш мынъ аьдемге ас аьзирлеп ашаткан. Толы болмаган мобилизация юрген заманда ол, аьр куьн эртен ерли военкоматына барып, ясларга демевлик этип, уьйкен казанда плов асып, самоварда шай аьзирлеп келген, солай болып, оьз эрки мен эм толы болмаган мобилизация бойынша шакыртылган гражданларынынъ аьеллерине азык-туьлик беруьв бойынша акциясын уйгынлаган», – деди Тимур Гаирбеков. Газимагомед Газимагомедовтынъ соьзи мен, ювык арада ол Кизлярдынъ кала эм район больницасын, картлыкта ялгыз калган эм ясуьйкен гражданлары яшайтаган уьйинде болмага, солай болып, сыйлы Раджаб айы бойынша сондай акцияларын озгармага мырат этеди.
Белгилеп озайык, предпринимательге мундай савга экинши кере тапшырылып туры. 2022-нши йыл ога «Дагестаннынъ халк баьтири» деген аты ман «Алтын Юлдыз» савгасы тапшырылган эди.
Суьвретте: Газимагомед Газимагомедовка савга тапшырылув мезгили.