Медицина куллыкшылары баьри халклардынъ эм заманлардынъ баьтирлери. Олар аьр куьн сайын йигитликлер этедилер: аьдемлердинъ яшавларын куткарадылар, эмлейдилер, авырыганларга сеним бередилер. Бу куьнлерде савлай дуныядынъ врачлары ман бирге районымыздынъ медицина куллыкшыларына да юкпалы коронавируслы маразы ман куьреспеге туьседи. Ак халатлыларга кешелерде уйкламай, оьзлерининъ аьеллерин калдырып, оьз ден савлыгын эм яшавын сынавга салып авырыганларга ярдам этпеге туьседи.
Янъыларда Ногай ЦРБ-да медицина куллыкшыларынынъ кеспи байрамына багысланган шатлыклы шара оьтти. Ак халатлыларды кутламага бу куьн мунда «Ногайский район» МР администрациясынынъ эм «село Терекли-Мектеб» СП МО администрациясынынъ куллыкшылары эм баскалар келдилер. Шатлык иелерин биринши болып «Ногайский район» МР администрациясынынъ аькимбасынынъ орынбасары Баймагомед Ярлыкапов кутлады.
– Сиз оьз яшавынъызды тыныш болмаган, яваплы, ама керекли кеспи мен байланыстыргансыз, сизге энъ де аявлы – аьдемлердинъ яшавы эм ден савлыгы тапшырылган. Сиз байрам эм тыншаюв куьнлерге карамастан, балаларга дуныяга энмеге коьмек этесиз, операцияларда катнасасыз, куьшли авырыганлардынъ яшавын куткарасыз, – деди район аькимбасынынъ орынбасары оьз соьзинде. Тагы да «Ногай ЦРБ-дынъ» баьри куллыкшыларына эм бас врачы Фаризат Межитовага каратылган разылык эм кутлав соьзлерин «Ногайский район» МР администрациясынынъ Ямагат палатасынынъ председатели Эльмурза Саитов, Ногай районы бойынша Чернобыльшылар союзынынъ боьлик етекшиси Руслан Кунтувганов, «село Терекли-Мектеб» СП МО администрациясынынъ куллыкшысы Айсылув Суюндикова айттылар. Уьстинликлерге етискен медицина куллыкшыларына Ногай район эм Терекли-Мектеб авыл, солай ок Ногай орталык больницадынъ администрацияларыннан Сый грамоталар тапшырылды. Оьз ис йолдасларын Фаризат Межитова да кутлады. Ол тийисли тыншаювга шыгаяткан куллыкшылары Ася Нарыковага эм Ханифа Эльгайтаровага медицина тармагында коьпйыллык намыслы ислери уьшин разылыгын билдирди. Тагы да Ногай район орталык больницасынынъ бас врачы Дагестан Республика бойынша Россия савлык саклав тармагынынъ Профсоюз организациясынынъ председатели Зумруд Бучаевадынъ атыннан Ногай ЦРБ профсоюз комитетининъ председатели Альфира Абдулкеримовага разылык хатын окып эситтирди.
Шарадынъ шатлыклы кезегиннен сонъ «Айланай» патшалык ансамблининъ артистлерининъ катнасувы ман концерт программасы уйгынланды. Шарады Бурлиянт Курманова ман Гюльгерен Савкатова юриттилер.
Н.Кожаева.
Суьвретте: савгалав мезгили.
