Дагестаннан элимиздинъ япсарларында оьтеяткан согыс спецоперациясында катнасатаган сегиз аьскершилерининъ балалары оьз аналары, кайбиревлери тетелери мен карагыс айынынъ 19-22-нши куьнлеринде Москва каласы бойынша кыдырдылар.

Савлай элимиз ериннен СВО зонасына аьскерлик борышын толтырувга шакыртылганлардынъ эм оьз эрки мен кеткенлердинъ аьеллери уьшин, Москва каласында «Кыскы эртегиси» деп, Янъы йыл алдында туристлик программа озгарылды. Оларга Кремльдинъ эм Л.В.Ломоносов атындагы МГУ меканынынъ курылысынынъ тарихи акында хабарланды, олар Заурядье паркы, Политехникалык музейи бойынша кыдырдылар, бас каламыздынъ Янъы йыл байрамына ярасыкланган орталык орамларын карап шыктылар.
Эм буьгуьнде аьеллер Дагестанга оьз уьйлерине кайтып келгенде, балаларды «Таза юрек» саваплык фондынынъ янъыйыллык савкатлары куьтип туры эди. Москва каласына барып келген бу куьпте Ногай районынынъ Орта-Тоьбе авылыннан СВО зонасында аьскерлик борышын толтырувга шакыртылып кеткен ердесимиз Замир Абубекеровтынъ аьели де бар эди. Аьел бийкеси Земфира эки саьбийлери мен Москва каласында болган куьнлери акында «Шоьл тавысы» республикалык газетасынынъ корреспонденти мен боьлисти.
– Балаларга баьри зат та ярады. Олар, мен оьзим де Москва каласын биринши кере коьзимиз бен коьрдик. Биз Измайлов паркында, Кызыл Майданда, Воробьевы тавларында, туьрли музейлерде болдык. Боьтен де балаларга космонавтика музейинде ярады. Балалар бек разы эдилер, эм мине энди биз Махачкала каласына ушып келгенде, аэропортта бизди йылы йолыктылар эм балаларга янъыйыллык савкатлар бердилер. Балаларымызга бас каламыз бойынша сондай кызыклы кыдырувды уйгынлаганларга ак юректен уьйкен разылыгымызды билдиремиз. Сонда туьскен суьвретлеримизди аьел басы, балаларымыздынъ атасына суьйиниш пен йибердик. Ол да ак юректен оьз разылыгын билдиреди бу кызыклы экскурсияды уйгынлаганларга. Балалардынъ элимиздинъ бас каласы Москва бойынша оьткен бу эртегиге усаслы кыдырув коьпке дейим сакланар, – деди ол.
Э.Кожаева, бас редактор.