Ногай ясларымыз оьзлерин илми, спорт, медицина эм сондай баска тармакларында ийги ягыннан коьрсетип, йогары етимислерине тийисли болып келедилер. Аьр кайсымызды да олардынъ йигерли алдыга барувы, аьр кайсы коьрсеткен етимиси де коьнъиллендирмей, суьйиндирмей болмайды.

Сондай ясларымыздынъ бириси – спортсмен кызымыз Роксана Руслан кызы Аминева. Яс спортсмени Ханты-Мансийск автоном округындагы Радужный деген каласында яшайды. Роксана сегиз йыллардан бери Радужный каласында «Юность» деген олимпиада резерви бойынша спорт школасына юрип, спорттынъ дзюдо, самбо кеплерининъ сыхырлыгына тренери Оксана Юрьевна Петровадынъ етекшилиги мен уьйренип келеди.
Оьзининъ куллыксуьерлиги мен, шыдамлыгы ман, оьнерли тренерининъ уьйретуьви мен спортсмен кызалак тек кала бойынша тувыл, округ, савлайроссиялык бойынша ярысларда да йогары етимисли орынларына, пьедесталдынъ бийик дережелерине тийисли болып келген. Айтпага, етимисли спортсмен кыз Тюмень каласында оьткен 2018-нши йыл тамбыз айында оьткен Н.П. Хохлов атындагы дзюдо бойынша регионлар турнирининъ савга иеси болып шыккан. 2019-ншы йыл Курган каласында оьткен УрФО бириншилигинде ез призеры болады. Ол савлайроссиялык физкультура-спорт комплекс ГТО ярысларда етимислер коьрсетип, куьмис белгиси мен савгаланган. Янъыларда Роксана Аминева спорт суьювшилерин тагы да бир уьстинлиги мен суьйиндирди. Спортсмен кыз Нижневартовск каласында кырк кийик айынынъ 4-5-нши куьнлеринде оьткен 44 килограмм шеккиси мен 18 ясына дейим кызлар, яслар арасында округ бойынша дзюдодан бириншилигинде биринши орынын бийлеп, енъуьвши болып шыкты. Онынъ аты балалар энциклопедиясына да киргистилген.
Ашык, дайым алдыга ымтылысы болган яс спортсмен кызымыз Роксана Аминевага спорт тармагында дайым алды сырада болып, бийик етимислерин, коьп енъуьвлерди сагынаман.
Г.Нурдинова.
Суьвретте: Роксана Аминева.