Янъыларда Дагестан Республикасынынъ Халк Йыйынынынъ Президиумы 51-нши (ноябрь) сессиясынынъ куьн йосыгын беркитти. Сонынъ бас соравы деп «2021-нши йылга эм 2022-нши эм 2023-нши йыллардынъ план кезегине каратылган Дагестан Республикасынынъ республикалык бюджети акында» деген закон проектин кабыл этуьв саналады.

Йыйынды парламент етекшиси Хизри Шихсаидов юритти. Президиумнынъ йыйынында ДР Оькиметининъ Председателининъ куллыгын юритуьвши Абдулпатах Амирханов катнасты.
Хизри Шихсаидов тезден республика парламентине ДР Оькиметининъ Председателининъ кандидатурасын ойласпага туьсееги акында билдирди.
Келеяткан сессияда ойласылаяк республикалык бюджетининъ закон проектининъ бас йоллары ман Президиум агзаларын ДР финанслар министри Юнус Саадуев таныстырды.
Онынъ айтувы ман, келеек йылга республикалык бюджетининъ келимлери 134 092 504 мынъ маьнет оьлшеминде болаяк деп белгиленеди яде бу сан 2020-ншы йылдынъ бюджетине коьре, 112,6 процент болады. Бюджет шыктажлары болса 137 328 645,9 мынъ маьнетке етисеек. Бюджет дефицити 3 236 141,3 мынъ маьнет болаяк деп каралады.
Келеяткан йылларга республикалык бюджетининъ келимлери байыр налог эм налог тувыл келимлери аркасы ман 4 174 миллион маьнет акшага арттырылганы суьйинтеди деди докладшы. Бюджет тармагынынъ куллыкшылары уьшин кыйын ак фонды оьстирилген, олардынъ кыйын акынынъ индексациясы эсапка алынган, республикалык «100 мектеб» эм «Ерли баславлар» деген проектлерининъ карыжлары аьр бириси 200 миллион маьнетке арттырылган.
Оннан баскалай, аьдеттегиден тыс аьллери, сонынъ эсабында коронавирус юкпалы маразы ман куьрес юритуьв, солай ок льготалары бар болган гражданларды дарманлар ман канагатлав уьшин резервлер фондын туьзбеге керек деген кенъес этилинген.
ДР Халк Йыйынынынъ Председатели Хизри Шихсаидов закон проектин ойласувды тамамлай берип, РФ Президенти баьримизди де халктынъ яшав аьллерин ийгилендируьвге, сонынъ санында – кыйын акты оьстируьвге онълайды деп белгиледи.