Мектебте окыган йыллар инсаннынъ эсинде бир де мутылмас шак болып каладылар. Сонъында баьримиз де анълаймыз, кайдай ийги, йылувлыкка толган заманда яшаганмыз. Биринши окытувшы, биринши дерис, биринши суьйим эм тувган мектеб пен аманласувдынъ мунълы ызгы занъы.

Сондай шагы ман буьгуьнлерде Тарумов районынынъ Ново-Дмитриевка авылынынъ яс яшавшысы Насипли Караянова да аманласады. Сосы авылда озды онынъ бала шагы, ерли мектебте алды кызалак берк билим. Биринши окытувшысы Галина Дмитриевна Михальченко эм класс етекшиси Мариза Юнидаевна Беккишиева Насиплиге берк билим бердилер, бу яшавдынъ аьлеметлигин де, кыйынлыгын да карсы алып уьйреттилер.
– Мен бек разы окытувшыларыма, олар мени коьп затка уьйреттилер, окувга суьйим эндирдилер юрегиме. Мектеб директоры Гульмира Алимпашаевна Манаповага бизди коьтергишлегени эм эс бергени уьшин савбол айтаман, – деп айтады Насипли. Энъ де суьйикли сабагы деп кызалак баслангыш классларда эсап дерисин санайтаган эди, сонъында ол химияды ийги этип окып баслады. Мектебте, районда, республикада озгарылатаган олимпиадаларда, конкурсларда катнасып, Насипли аьр заман баргылы орынларды алатаган эди. Ол – Тарумов районынынъ волонтеры.
11-нши классты уьстинликли битирип, кызалак химия сабагыннан сынавдан 100 балл алган, 100 мынъ маьнет акшага сертификатты Насипли Караяновага Дагестан Республикасынынъ Аькимбасы Сергей Меликов тапшырды.
Насипли келеекте педиатр болмага ниетленеди. Онынъ алдында – ашык йоллар. Биз ога баьри ийгиликлерди, уьстинликлерди йораймыз.
Г.Бекмуратова.
Суьвретте: С.Меликов Н.Караяновага сертификат тапшырув мезгилинде.