Бизим газетадынъ сайтында билдирилгенлей, янъыларда Ногай районында ис йорыгы ман Дагестан Республикасынынъ Оькиметининъ Председателининъ орынбасары Муслим Телякавов пан Дагестан Республикасынынъ Билимлендируьв министри Яхья Бучаев болып кеткенлер.

Олардынъ районга келуьвининъ бас ниети – алдынгы «Орленок» балалар савландырув лагерин карав эм бу учреждениеди кайтадан тургызув. Сонынъ акында ДР Билимлендируьв министри Яхья Бучаев газетамыздынъ хабаршысына оьз ойы ман боьлискен.
– Биз Ногай районына Дагестан Аькимбасы Сергей Меликовтынъ алдынгы «Орленок» балалар савландырув лагерин кайтадан тургызув акында тапшырувы ман келгенмиз. Сергей Алимович Ногай районына оьзининъ былтыргы келуьвинде, оннан сонъ балалар тыншаювын уйгынлав бойынша бир неше кере оьткерген кенъесуьвлеринде бу маьселеди белгилеген. Соны ман аьлиги заманда бу сорав ойласылып туры.
Биз лагерь орынласкан ерге бардык эм соны оьз коьзлеримиз бен коьрдик. Бу ердеги участокты «Ногайское лесничество» ГКУ аьзирлеген. Мунда орынласкан меканлар заман узагында куьшли тозганлар. Олар баьриси де муниципаллык байырлыгында турадылар. Биз айырым юридический лицо – патшалык учреждениесин туьзеекпиз. Оннан сонъ Ногай районынынъ етекшилери алдынгы лагерьдинъ ериндеги тозган мекан-муьлкти аьлиги туьзилип турган учреждениеге эм сонъында сол туьзилген учреждение эсабына орманлык фондынынъ байырлыгы болып саналатаган ер участогын да беркитуьв ниет пен Дагестан Республикасынынъ казнасына беруьв акында тилек этеекпиз.
Муннан сонъ биз тез курылатаган конструкцияларды аькелетеганлар ман соравды ойласаякпыз, неге десе орманлык хозяйствосы ерлеринде капиталлык курылыс ислери закон бойынша юритилмеге ярамайды. Сол себептен меканлар модульли тез курылатаган сапатлы конструкциялар кебинде курылаяклар.
Суьвретте: Дагестан Оькиметининъ ваькиллери мен Ногай район етекшилери алдынгы район «Орленок» балалар лагери еринде.