Яс аьдем – ол ким? Онынъ алдында – мынъ йоллар, онынъ басында – айкасып турган мыратлары. Соларды яшавга шыгарув уьшин ис аьрекетти белсентпеге, керекли ерде куьш салмага да туьседи. Аьлиги заманнынъ яс аьдеми мен бир отыз йыл арттагыды тенълестирип те болмаймыз, олардынъ араларында айлак коьп баскалыклар бар.
Мен сол эки туьрли заманлардынъ араларындагы яслары несилден боламан, туьрлилиги мага аян коьринеди. Алдынгы заманнынъ яс аьдеми касиетине коьре де баска, онынъ алдында мырсатлар да аз болган, а аьлиги заманнынъ яс аьдеминде мырсатлар айлак коьп. Айтпага, Россия Федерациясынынъ Президенти мен беркитилген Ортак Патшалык сынавлар мектебти кутарган яс аьдемге (эгер билими йогары аьлде болса) коьп йолларды ашады. Ол Россия Федерациясынынъ кайсы каласындагы йогары окув ошагына туьспеге де болады. Сога коьре де болар, аьлиги заманларда ясларымыз Россиядынъ кайсы каласында да окыйдылар. Миллетимиздинъ ваькиллери Сырт якларга кетуьви де бизим алдымызда коьп мырсатлар ашты.
Аьли соьзим сондай ясларымыздынъ бириси – ХМАО-Югра Сургут медициналык колледжининъ студенти Айнагуль Сайфудин кызы Шамбилова акында.
Айнагуль Ногай районымызда тувып, сырт якларда оьсип келетаган яс аьдем болады. Ол оьз ногай халкыннан армаганда оьсетаган болса да, ногай аьдетлерин тутып, миллет асларын асып, оьзининъ менлигин тутпага шалысады.
Айнагуль Шамбилова Сургут каласында мектебти ийги белгилерге окып битиргеннен сонъ, медицина тармагын сайлады. Ол – оьзининъ касиетине коьре бек языкшыл кызалак, сол да кеспи сайлавда оьзининъ себеплигин эткен болар деп ойлайман. Бу куьнлерде ол ХМАО-Югра Сургут медициналык колледжининъ биринши курсын битирип туры. Айтылган окув ошагын уьстинликли окып битиргеннен сонъ, кеспи бойынша исин бардырмага ниетленеди.
– Аьдемлерге коьмек этуьв – медицина кесписин сайлаган аьдемнинъ бас борышы деген ойга таянаман, –дейди Айнагуль Шамбилова. Меним ойыма коьре де, Айнагуль оьз касиетине келисли кеспиди сайлаган. Тек оны заман коьрсетер.
Аьли уьшин Айнагульди тек алдына салатаган мыратлары даьвлендиреди. Медициналык окув ошагын окып битиргеннен сонъ, Айнагульдинъ мырады – Авыл хозяйство йогары окув ошагынынъ «Экономика эм предпринимательство» факультетине туьсуьв.
Мен ак юрегимнен Айнагуль Шамбиловады, бу куьнлерде белгиленген Россия яслар куьни мен кутлап, алдыда тек ийгиликлерди, алдына салатаган баьри мыратлары толганды йорайман.
Сенинъ, Айнагуль, алдынъда тек наьсип кусы айланып турганды йорайман.
Г.САГИНДИКОВА.
Суьвретте: А.Шамбилова
