Оьткен юмадынъ ызгы эки куьни ишинде Ногай район орталыгы Терекли-Мектебке Дагестан Республикасынынъ туьрли ерлериннен спорт пан каьр шегетаган яслар конакта болып кеттилер. Бу куьн олардынъ бизге конак болувынынъ маьнеси – Терекли-Мектебте Дагестан Республикасынынъ ямагат аьрекетшиси Залимхан Нукай увылы Арслановтынъ эстелигине багысланган эркин куьрес озгарылды. Бу шара Россия байрам куьнинде уйгынланды.

Уьстимиздеги йылдынъ тамбыз айынынъ 12-13-нши куьнлеринде Дагестан Республикасынынъ Ногай район орталыгы Терекли-Мектебке эки юз эллиге ювык спортсменлер келдилер. Олар 2005-нши йылдан алып тоьмен яслы болган, Дагестан Республикасынынъ Тарумов, Кизляр, Бабаюрт, Кизилюрт, Карабудахкент, Ботлих районларыннан, Кизляр, Хасавюрт, Махачкала калаларыннан эм Ставрополь крайыннан, Карашай-Шеркеш, Кабарты-Балкар эм Шешен Республикаларыннан спортсменлер эдилер. Биз алдыда келтирген Россиядынъ туьрли регионларыннан келген спортсменлерге маьне берип карасак, бу шара республикалык кезекте тувыл, Россия кезегинде болып оьткен шарага айланады.
Дагестан Республикасынынъ ямагат аьрекетшиси, ногайымыздынъ патриотларынынъ бириси эм ийги деген увылларынынъ бириси Залимхан Арслановтынъ эстелигине багысланган шара йогары дережеде уйгынланып оьтти. Мен оны ногайымнынъ ийги увылларынынъ бириси деп айтпага коркпадым, неге десе оны таныган аьдем онынъ юрек юмсаклыгы, аьдемшилиги акында айтпай озбас, мен оны ман яшав бойынша аьллескенмен. Ол кашан коьрсенъ де, яслар акында каьр шегип юретаган эди. Бир ястынъ спорт карувын коьрсе болар эди, оны ол кайда да аькетип, оьрленуьвге йол ашпага шалыскан аьдем эди. Эди деп айтувым да коьнъилимди туьсиреди. Шынтылай да яслардынъ насихатшысы эм тербиялавшысы эди…
Бу куьн Залимхан Нукай увылынынъ эстелигине багысланган спорт шарасында Ногай район командасы алдышылыкты алды. Сол да бизим тренерлердинъ етимислери. Мундай шаралардынъ оьтуьви спорт пан каьр шегетаган ясларымызга, алдыга ымтылмага куьш те береди.
Г.Сагиндикова.
Суьвретте: шара енъуьвшилери тренер А.Нартупов пан.