Яшав. Аьдем бактысы эм оьмири. Кайдай да болады. Оларды уьйкен тенъиздинъ толкынлары ман да тенълестирмеге болаяк. Биреви сабыр, баскасы, каты агын кимик, алгасавлы алдыга шабады, бир-бирине ашувлы урынады. Аьдем касиети де тап сондай, бир аьдемлер берген соравга алгасамай, анълавлы кепте яваплар, баскасы – оьзи бек аьруьв анълаганлай, оны тынълавшы да анълайды деп ойлап, айтар, ызында бир-бирин анъламаган аьдемлер араларында тавыс коьтерилуьв аьлде соьз де болмага болады. Сол затты яшав коьрсетип келеятыр. Мундай аьллер аьдемлер коьп болатаган ерлерде болып кетеди…
Мен ис борышыма коьре, берген неше соравыма да (коьз бе коьз коьриспегенмен, тек телефон аркалы соьйлеймиз) Ногай орталык больницасында он бес йылга ювык заман врач-эпидемиолог орынында ис аьрекетин бардыратаган, Аклима Зиявдиновна Нургушиева сабыр аьлде яваплайды. Аьлиги заманларда йогары кеспилери болса да, тербиясы йогары болмаган специалистлер мен де йыйы расамыз, тек оьз кылыклары ман суьйдирген аьдемлер де боладылар. Меним ойымша, сондай хатынлардынъ эм специалистлердинъ бириси Аклима Зиявдин кызы болады.
Аклима мектебти кутарганнан сонъ, Белгород каласындагы патшалык йогары окув ошагында врач кесписин алган. Онынъ ис аьрекети Грозный каласындагы РКЦИБ-да, врач-инфекционист орынында басланды. Сонда ол бу кеспидинъ авырын да, кыйынын да коьрди, биринши сулыбын да сонда алды. Оннан сонъ, бактысына коьре, Ногай район орталык больницасында ис аьрекетти бардырмага туьсти. 2007-нши йылдан алып Аклима Зиявдин кызы врач-эпидемиолог болып аьрекетин бардырады. Ол оьзине тапшырылган ис борышларын йогары яваплылык пан бажарады.
Ногай ЦРБ етекшиси Фаризат Янибек кызы Межитова онынъ исине йогары баады да береди.
– Аклима Зиявдин кызы Нургушиева– бу куьнлерде йогары квалификациялы категориясы болган врач. Ол 2019-ншы йылда Савлайроссиялык савлык саклав тармагында «Сапатлар алдышысы» шарасында да катнаскан эм «Энъ де ийги эпидемиолог» деген сыйлы атка тийисли болган. Бу шара баслап республика кезегинде, сонъ Россия бойынша оьткериледи. Солардынъ экевинде де Аклима катнасып, 1-нши эм 3-нши орынларга тийисли болган.
Сол бизге уьйкен етимис эм уьстинлик эди, – дейди Фаризат Межитова. Бу Аклимадынъ етимислерининъ тек басыдыр деп сенемиз, алдыда да сондай айтылган енъуьвлер коьп болсынлар.
Савлай дуныя аьдемлерине кыйынлы заман – коронавируслы мараз яйылган шак, Аклима оьзининъ ис йолдаслары ман бирге алды сырада болды. Ол, бириншилердинъ бириси болып, сол зарарлы маразлылар ман аьрекетин бардырды, аьли де аьллер енъил болса да, баьри толы билдируьвлер, маразлылар акында, Аклимадынъ колында.
Хатын-кызлар байрамында сондай билимли, аьр соравга тийисли явабын берген, оьз исине мукаят аьдемге тек саьвлели куьнлерди, тынышлы, авырувлыларсыз туьнлерди йораймыз.
Г.Курганова.
Суьвретте: А.Нургушиева.
