Ногай район администрациясынынъ кезекли аппарат кенъесинде ясларды аьскерге шакырувдынъ язлык кампаниясынынъ, ДР Халк Йыйынынынъ 20 эм 21-нши сессияларынынъ тамамлары эм район администрациясынынъ ер тергев бойынша боьлигининъ эсап беруьви акында соравлар ойласылган.

Кенъестинъ биринши соравы бойынша шыгып соьйлеген Тарумов эм Ногай районларынынъ аьскер комиссары Александр Мельников военкомат оьткен йылдынъ куьзги аьскерге шакырув борышларын 100 процентке толтырганын билдирди. Буьгуьнлерде военкомат РФ Президентининъ 30-ншы мартындагы Указы бойынша язлык шакырув кампаниясынынъ борышларын толтырув уьстинде ислейди. Мельников военкомат ясы еткен гражданларды аьскерге шакырув эм армияга йиберуьв бойынша оьзининъ алдына салынган борышларды толы кепте толтыраягына сендирди.
– Бу йолгы аьскерге шакырув шагында алдынгыдай болып 18 ясыннан 27 ясына дейим гражданлар шакыртылаяк. Эндиги йылдан алып аьскерге шакырув ясынынъ йогары оьлшеми 30 яска дейим коьтерилеек. Соны ман бирге 2024-нши йылдан алып 19 ясына толган яс аьдемлер шакыртылаяклар. Соьйтип, йылдан-йылга аьскерге шакырув ястынъ тоьмен оьлшеми 21 яска етип токтаяк. Олай дегени, келеекте аьскерге 21-30 ясларындагы гражданлар шакыртылаяк. Быйыл бизим призывниклер аьскер сырасында 1 йыл куллык этееклер. Болса да армияда куллык этуьв болжалды алдынгыдай 2 йылга дейим оьстируьв акында сорав да ойласылады. Тек сога карамастан, аьскер сырасына куллык этпеге шакыртылган яс аьдемлер СВО юритилип турган дав ерлерге йиберилмеек, – деп билдирди А.Мельников.
Аьскер комиссары ога берилген соравларга яваплады.
Кенъесте солай ок ДР Халк Йыйынынынъ депутаты Мурзадин Авезов, район администрациясынынъ ер тергев боьлигининъ етекшиси Алимурза Менглиязов, район аькимбасы Джамалутдин Эсиргепов шыгып соьйледилер. М.Авезовтынъ эм А.Менглиязовтынъ материаллары газетадынъ кезекли номерлеринде баспаланаяк.
Бизим хабаршы.