Дагестан Аькимбасынынъ эм Оькиметининъ Администрациясынынъ етекшиси Алексей Гасанов янъыларда Регион ман етекшилев орталыгы (ЦУР) 20-ншы январьден 15-нши февральге дейим аянлаган соравларды ойласув ниет пен кенъесуьв оьткерген.
Гасановтынъ соьзи мен, ЦУР республика яшавшылары ман байланыс тутувда бас орган болып саналады, сонынъ уьшин олардынъ шагынувлары эм соравлары, бир соьзсиз де, эске алынмага керек. Бу баьри зат та властьтинъ толтырувшы органлары ман республика Оькимети биргелесип аьрекет этуьв уьшин бас приоритетлердинъ бириси болады.
Социаллык тармакларында халк коьтеретаган соравлардынъ коьбиси, деп белгилеген Гасанов, Дагестан турак уьй-коммуналык тармагында туьзилген аьллерди аянлап коьрсетеди. Мысалы, кыста аьдемлер оьз уьйлеринде йылы болганын суьедилер, электроярыгы, газ эм сув ман канагатланув яктан иркилуьвлер болып коймасын деп навасызланадылар. Бу соравлардынъ коьбиси йыллап йыйылганы ман ол макул болды, болса да «соларды аьли эм бу ерде ок та шешпеге керегеди», – деп билдирген.
«Бизим борышымыз яшавшылар ман байланыс тармакларын пайдалы кепте уйгынлав эм беркитуьв болады, неге десе аьдемлер бизден аян ислерди куьтедилер. Шешилмей калган кайсы бир маьселе де министерстволардынъ, ведомстволардынъ, муниципалитетлердинъ тийисли кепте ислемегенин коьрсетеди. Сырагысында ол зат гражданлар ман биргелесип аьрекет этуьвдинъ хайыры йоклыгына шайыт болады», – деп белгилеген Дагестан Республикасынынъ Аькимбасынынъ эм Оькиметининъ Администрациясынынъ етекшиси.
Солай ок Алексей Гасанов бу ягыннан динамикады коьрмеге керегин, яшавшылардынъ тилеклери не уьшин йыллап шешилмей калувынынъ себеплерин анъламага тарыгын айтып белгилеген. Соннан сонъ, деген ол, тийисли шараларды коьрмеге керегеди.
Республикадагы ЦУР-дынъ ойласылатаган заман болжалы ишинде эткен куллыгы акында сонынъ етекшиси Магомедсултан Абдуралимов хабарлады.
Быйылдынъ 20-ншы январиннен 15-нши февралине дейим ЦУР халктан туьскен 4 мынънан артык соравларды карап уьлгирген. Соравлардынъ эм шагынувлардынъ коьбиси Махачкала, Дербент, Каспийск эм Буйнакск калалардынъ яшавшыларыннан туьскенлер.
Суьвретте: Алексей Гасанов.
