Яй куьнлеринде табиат ясылланады, тоьгерек як коьзге яркын болып туьседи. Иссилик аьдемди йоьнъкитсе де, яй шагы онынъ коьнъилин коьтермей болмайды. Соны ман бирге, оькинишке, тоьгеректеги наслык та коьринеди.
Сол баягы Баьтирлер Аллеясы акында хабар.
Коьплеген аьдемлер юредилер Аллея ман, каргалар ша йок болгандай болдылар, ама кокыс коьбейди. Биревлердинъ айтувына коьре, сол пакетлерди авылдаслар аькелип таслайдылар. Меним хаьтериме сол соьзлер тиедилер. Гагарин атындагы орамда туратаган авылдаслар уьшин мен бир шекленмей айтпага боламан, Аллеяга олар кокысларын аькелип тасламайдылар.
Эндиги болса, куьн сайын эртенъликте Аллеяда оьрип коькислер юредилер. Аллеядынъ капысын ашып, коькислерин киргизгенлерди коьргенлер де бар.
Янъыларда электроярык кететаган теллерге тиетаган тереклердинъ бутакларын шаптылар, сол да бек ийги, ама оьзининъ артыннан бирев де йыйнайым деп ойламайды. Сога меним сейирим калады, уьйлеринде де солай ма экен? Бутаклар баьтирлердинъ эстеликлерининъ арасында ятыр.
Аллеямыздынъ коьркин карасанъ, юрек авырмай болмайды. Неше кере де язаман сол заттынъ акында маьселе деп, аьли ойлайман, сол маьселеди меннен баска бирев де маьселеге санамайды усайды. «Шоьл тавысы» республикалык газетасынынъ бетинде коьтерилген маьселеге маьне бермей койганлары да тынышсызландырады бизди. Эндиги йол эки администрацияларынынъ капыларын какпаса болмаса ярайды, белки биреви сама ашылар.
Ногайымнынъ акыйкат айтувларынынъ бирисин туьрлендирип айтканда, «Аллеядынъ капысы ашык болса, коькиске де намыс керек». Коькиске ше бир сорав да йок, ол – тилсиз айван, тек сол капыды ашканларга ша бираз сама намыс артыкашлык этпес эди, деп эсиме келеди.

Г.Бекмуратова,
Дагестан Республикасынынъ ат казанган маданият куллыкшысы
Суьвретте: коькислер Баьтирлер аллеясында.