Куьнбатар авыл орта мектебинде ________________

Янъыларда Куьнбатар авылынынъ орта мектебининъ окытувшысы Сабират Алимжановна Агисова биринши класс окувшылары ман алтын куьзге багысланган шара озгарды.

Шарага деп класс бек аьруьв этип ярастырылган, ярасык йыл шакларынынъ бириси – куьзди коьрсеткен суьвретлер илинген. Байрамга ата-аналар да шакырылдылар. Мунда балалар туьрли-туьрли ярысларда оьз куьшлерин сынадылар. Олар болса бек кызыклы эдилер. Солай ок окувшылар ятлавлар яттан айттылар, ярасык биювлер бийидилер, йырлар йырладылар. Ата-аналар болса балалардынъ оьнерлерине сукланып, карс-кагып турдылар.

Окытувшыдынъ оьз исине мукаят эм яваплы экени, балаларды да бек суьетаганы сезилмей болмады. Балалар да окытувшысынынъ аьр бир соьзин ерге туьсирмей, борышын толтырганы да коьринди. Бу зат аьдемди канатландырмай болмады.

Шарадан Сабират Алимжановнага ата-аналар бек разы болып кайттылар. Ога ден савлык, куллыгында уьйкен уьстинликлер, окыткан балаларына етимислерди баьри окувшыларынынъ ата-аналары атыннан йорайман.

А.Янбаева.