Россия Президенти Владимир Путин ДНР, ЛНР, Херсон эм Запорожский областьлерде референдумлар оьткеруьв мен байланыста Россия гражданларына каратылган шакырув ман шыгып соьйледи. Оьз соьйлевинде элимиздинъ басшысы айтылган регионлардынъ карарын коьтергишлев керек деген ойын айтты.
– Донецк эм Луганск халк республикаларынынъ, Запорожский эм Херсон областьлерининъ яшавшылары алган токтасты биз коьтергишлермиз, – деп айтты ол.
Мен элимиздинъ басшысы Владимир Владимирович Путиннинъ Россия халкына шакырувын ийги этип тынъладым. Ол тез арада болаяк референдумлар акында, толы болмаган мобилизация акында айтты. Мен, Ногай районынынъ Ямагат палатасынынъ председатели, бу токтасларды макул коьремен. Меним ойыма коьре, Россия Федерациясына косылув ман байланыста озгарылатаган референдумларга Донецк эм Луганск халк республикаларынынъ, Запорожский эм Херсон областьлерининъ яшавшылары кайзаманнан бери аьзир болган. Олар бизим элимизге косыламыз деп карар алса, кайбиримиз де соны коьтергишлермиз.
Толы болмаган мобилизация аьлиги заманда керекли, неге десе Украина нацистлери эм ВСУ ман куьрести куьшлендируьв керек. Буьгуьнлерде йогары патшалык эм согыс етекшилеви мен алынган амаллар Украинада эм Донбасста болып турган аьллерди ийги якка туьрлендирер, кардаш халкларымызды нас бандеровшылардан босатар.
Мен Ногай районынынъ ямагатынынъ атыннан Украинады аьлиги заманда коршалап турган эм мобилизация бойынша шакыртылаяк дагестаншыларга, солардынъ ишинде Ногай районынынъ яшавшыларына, тезден енъуьв мен уьйге кайтып келгенин йорайман.
Э.Саитов,
Ногай районынынъ Ямагат
палатасынынъ председатели.