Оьткен юма сонъгы куьн Оренбург каладынъ «Оренбуржье» спорт клуб-комплексинде куьрес бойынша финал кезегининъ ярыслары болып оьткен. Сонынъ сырагысында яс ердесимиз Альберт Батыргазиев (суьвретте) чемпион атын казанган.

Альберт Батыргазиев 60 килограммга дейим шекки боьлигининъ сырасында эди. Онынъ шекки боьлигинде куьндеси бу йол элимиздинъ аьлиги чемпионы Джамал Бадрутдинов болды. Соны ман бирге Альберт Батыргазиев те элимиздинъ чемпионы экенин белгилемеге туьседи, тек ол муннан бир йыл алдын баска шекки боьлигининъ сырасында эди.
Куьресуьвши ясымыз ярысты бек аьруьв оьткерди эм куьндесин енъди. Соьйтип Альберт Батыргазиев Россия чемпионы болды.
Бу турнирде яс спорстменлер Токио калада озаяк Олимпиада ойынларында катнасувга, миллет йыйылыс командасынынъ сырасына кирмеге деген ыхтыярды алув ниет пен ортакшылык эттилер.
Россия чемпионатынынъ баргылар фонды 10 миллион маьнет акшага етисти. Чемпионларга 500 мынъ маьнеттен, финалга шыкканларга 250 мынъ маьнеттен тапшырылды. Сонынъ да кырыннан аьр бир шекки боьлигиндеги енъуьвшилер акшалай баргы ман бирге KIA Rio автомобили мен де савгаландылар.