Шатлыклы аьлде ашылды
Оьткен саьли куьн Совет Союзынынъ Баьтири Амет-Хан Султан атындагы Махачкала аэропортында халклар ара ава йолларынынъ янъы терминалы ашылды. Онда Республика Аькимбасынынъ куллыгын кесек заманга юритуьвши Сергей Меликов, ДР Оькимет секретари Хизри Абакаров, Россия коьлик тармагынынъ министрининъ орынбасары Игорь Чалик, Махачкала аэропорты директорынынъ орынбасары Саид Рамазанов эм баскалар ортакшылык эттилер.
«Янъы терминал шеретлер мен байланыслы маьселелерди шешпеге, пассажирлерге онъайтлы болмага керек. Аэропорттынъ оьрленуьви савлай регионнынъ оьрленуьвине косымша эсабында болып, регионлар ара эм шет эллер мен тыскы экономикалык байланысларды ийгилендируьвге себеплик этеек», – деди Сергей Меликов.
Маьселели соравлар ойласылды
Озган каты куьн Дагестан Республикасынынъ авылхозяйстволык эм азык-туьлик министри Баттал Батталов Ногай районында болды эм кенъес озгарды. Кенъесте ерлердинъ кумланув соравы ойласылды. Йолыгыста республикамыздынъ авылхозяйстволык эм азык-туьлик министрининъ биринши орынбасары Шарип Шарипов, Ногай районынынъ аькимбасы Мухтарбий Аджеков, республикалык коьшпели малшылык управлениесининъ етекшиси Наби Абдулгамидов эм баскалар катнастылар.
Республикамыздынъ бас каласыннан келген делегация кумларды токтатув уьшин терискен эм джузгун тереклер шашылаяк ерлерди карады, 30 эм 67 гектар ерлерде сув бар экенин коьрди. Солай ок конаклар районнынъ орманлык фондын карадылар, мунда фитомелиоративли куллыклар уьшин оьсимликлер аьзирлемеге болады. Солай ок кумлар ман куьресуьв уьшин коьпйыллык оьленлерди шашпага кереклигин айттылар.
Кенъесте буьгуьнлерде оьткир эм маьселели соравлар каралды.
Тек уьстинлик сага, Альберт
Ногай ясымыз Альберт Батыргазиев, Токиода оьткен Олимпиадада чемпион атын казанып, уллы Россия элининъ тарихине кирди.
Бу суьйинишли спорт янъылыгы бизим район орталыгынынъ маданият уьйи алдына коьплеген аьдемлеримизди йыйды. Сол 5-нши август куьнинде байрамша коьнъилленген яшавшыларымыз алдында, суьйинишлерин коькиреклерине сыйдыралмаган кайбир ердеслеримиз оьз соьзлерин айтпай болмадылар.
Дагестан парламенти сырасына уьш кере шакыртылып, республикамыздынъ белсен политика аьрекетшиси Мурзадин Алибекович Авезов булай деди: « Олимпиада чемпионы Альберт Батыргазиев халкымыздынъ тарихин мукаят та байытты. Ол , ногайымыздынъ атын йогары такта айттырып, оьзининъ бийик етимиси мен бизим миллет оьктемлигимизди арттырды, коьнъилимизге коьнъил косты, ян тоьримизди суьйинишли сезимлерге бийлетти. Сага берк ден савлык, куьш-куватлык, уьйкен наьсип йорайман. Тек уьстинлик сага, Альберт, баьри ерде де тек уьстинлик!»
Байрамга айланган яшавшылар йыйылысындагы аьр аьдем йогары коьнъилликте эди.
Бек суьйиндим
Мен, баладай болып, бек суьйиндим Альберт Батыргазиевтинъ сондай йогары енъуьвге етискенине. Сонда ок Бабаюрттагы досларыма занъ соктым. Бу янъылыкты эситип, олар Альберт ногай миллетли эм йынысы ман Геметюбе авылдан экенин аянладылар. Бу затлар акында мен Альберттинъ куьресуьвининъ финалында енъген биринши такыйкаларында ок билдим занъ согув ман.
Ак юректен оьз атымнан эм олимпиададынъ спорт кеплерин суьювши баьри мышыгызлар атыннан ногай халкынынъ увылы Альберт Батыргазиевтинъ сондай йогары етимиси мен кутлайман. Армаганда да бизим ногайлар, савлай дуныя бойынша атын айттырып, йогары етимислерге етисип, олар ер юзиндеги баьри халклар ишинде ийгилердинъ бириси болып калмай, солай ок аьлемет эм ян-куватлыгы яктан берк халк экени билинсин.
Руслан Караев.
Грозный каласы.
