Тарумов эм Ногай районларында Россия Федерациясынынъ Президенти Владимир Путиннинъ тапшырувы ман басланган толы болмаган мобилизация оьтеди. Онынъ барысы акында муниципалитетлер службалары билдиредилер. Колларына повесткалар алган эр кисилер военкоматка йыйналганлар, сонъында республикалык йыйылма пунктына йол алдылар. Яслар ман аманласпага Тарумов военкоматына ерли властининъ, депутат корпусынынъ, ямагатшылыктынъ ваькиллери, солай ок кардаш-тувганлары эм дослары келдилер.
Дагестан Республикасынынъ Ногай эм Тарумов районларынынъ военкомы Александр Мельников аманласув соьзинде ясларга яхшы йол йорады эм толы болмаган мобилизация акында анълатувлар этти.
Аталыкты коршалавга кетип бараятканларга насихат соьзин «Ногайский район» МР аькимбасы, Шешен Республикасынынъ еринде контртеррористлик операциясында согыс аьрекетининъ ветераны, «За ратную доблесть» медалининъ иеси Джамалутдин Эсиргепов айтты.
– Сиз, бизим баьтирлер, Аталыгымызды, оьз аьеллеринъизди коршаламага барасыз. Мен сизге соьз беремен – сизинъ аьеллеринъиз эс берилмей калмас, мен сиз куллык этеек аьскерлер боьлигине келермен, – деди районымыздынъ басшысы.
Йылы соьзлер ясларга Тарумов районынынъ аькимбасы Александр Зимин де айтты.
– Сизинъ бактыларынъыз тыныш тувыл заманларга келди. Яв карап турмайды. Мен сизге йигерлик эм кыйынлы заманда шынты дослыкты йорайман. Биз сизди куьтемиз, бир-биринъизге тирев болынъыз, коьтергишленъиз, бизди енъуьвлер мен суьйиндиринъиз, Кудай сакласын сизди, – деп айтты ол.
Кардаш-тувганлар да ясларды йолга салдылар. Олардынъ арасында Алиасхаб Давутбеков та бар, ол увылы Арсенди эм иниси Тимурды йолга салмага келген. Алиасхаб оьзи – аьрекет этип турган аьскерши, взвод командирининъ орынбасары, специальли согыс операциясынынъ катнасувшысы. Харьков областинде яраланган, уьйге кесек заманга келген, тагы да аьрекет эткен ерине кайтаяк.
– Баьри зат та аьруьв болар, тек эрклигимизди, енъуьвге сенимимизди йойытпага керек тувыл. Баьриси де уьйлерине аман-эсен кайтып келсинлер, – деп йорады Алиасхаб.
Украинада тувган, Тарумов районынынъ «Рассвет» газетасынынъ редакторы, ана, тетей Леся Прокопенко буьгуьнлерде оьз ерин коршаламага кетип бараяткан баьри эр кисилерге Кудай оларды баьле-казадан сакласын деген йорав этти.
Баьри мен де аманласкан йигитлер йол алдылар.
Бизим хабаршы.
Суьвретте: яслар ман аманласув мезгили.
