Балалар биринши класска барса, оларга баьри зат та кызыклы болады. Биринши аьрип, биринши окытувшы, биринши уьстинлик. Сондай, кишкей болса да, суьйинишлерден басланады окув йыллары, соьйтип бала уьйкен билим йолына абытлайды.
Амина Сарсеева – Карасу авыл мектебининъ биринши классынынъ окувшысы. Мектебке алгасап эм суьйип барады Амина. Ярасык кийим кийип, эки оьрмеге оьрилген шашларына ап-ак аьпелекли бантлар таккан кызалак эртенъликте мектебке барып, дерислерде олтырып, билим алады.
Окытувшыдынъ айтканын тынълайды, оьзин тынълавлы эм билимли этип коьрсетеди кызалак, мектебте онда коьп дослар эм кыймаслар бар. Амина окымага, язбага суьеди, берилген уьйдеги исти ерине еткерип толтырады.
Окувшы «Маьметекей — 20» деген конкурста катнасты. Янъыларда Амина «Туьрли туьсли тамшылар — 2022» балалар суьврет ясав конкурсында катнасып, биринши орынды алды. Мектебте «Билимге ымтылып» деген марафонда энъ де ийги сырагылар алганы уьшин Амина грамотага тийисли болды.
Амина онлайн-конкурсларда, олимпиадаларда да катнасады. Окув айлары ишинде ол 4 грамотага тийисли болды. Соьйтип окувшысына билим береди Аминадынъ биринши окытувшысы Бурлият Мусаевна Тангаева.
Амина Сарсеева ийги окыйтаганы уьшин мектебтинъ линейкасында байракты коьтермеге тийисли болган. Аминадынъ анасы кызынынъ уьстинликлерине куьезленеди эм онынъ окытувшысына, мектеб коллективине уьйкен разылыгын билдиреди.
Келеекте Аминага коьп уьстинликлер йораймыз.
Г.Бекмуратова.
Суьвретте: А.Сарсеева.